MZP in MPSC Pisa kai tur an dang tan; MPSC in thilphut tih hlawhtlin chi-ah an ngai lo
MZP General Hqrs. chuan Mizoram Public Service (MPSC) siamthat nawrna atana ni hnih chhung an nawr hnuah an thilphutte tih hlawhtlin a nih loh avangin nimin khan MPSC-a thawktute Pisa kai tur an dang a, MZP President Dr. C. Lalremruata chuan MPSC zahawmna leh MPSC laka thalaite rinna a tlakhniam avanga siamthat hnatlang an koh thu sawiin, an thilphut hi MPSC leh Mizoram sawrkar-in a tihhlawhtlin sak hma chuan lungawilohna lantir chhunzawm zelin MZP General Assembly thulh ngai khawpa hmalak ngai a nih pawhin an thilphut hi nawr chhunzawm zel an tum thu a sawi a. MPSC Pisa kai tur an dan tur an hriat avangin MPSC Chairman chuan an thilngiatte sawiho turin MZP-te a sawm tih sawiin, hetihlai hian MZP hruaitute chauh ni lo, MPSC a hna diltu aiawhte leh College SU hruaitute tel lo chuan an sawiho pui theihloh tur thu an hriattir nghal tih a sawi a. Nimin-a Pisa kai tur an danna ah hian Dan leh thupek kengkawhtute nen rei vak lo chu an innawr nghe nghe a ni.
Hetihlai hian nimin khan Mizoram Public Service Commission (MPSC) chuan thuchhuah siamin MZP thilphut zinga mi, OTR tihtâwp te, OTR-a document upload kim loh avanga application reject tawh te offline-a document thehluh tir tur tih te chu pawm chi ah an ngei lo tih tarlangin, “OTR tihtâwp hi buaina chinfelna tur ni lovin, applicant-te tana buaina thar siamsaktu tûr zawk a ni,” an ti a. MZP-in OTR-a document upload kim loh avanga application reject tawh te tan offline-a document thehluh hun pek an sawi pawh Candidate thenkhat tan thil tha tak ni thei mah se, Recruitment Process pumpui thlirin MPSC chuan tih hlawhtlin theihah a ngai lo tih tarlang bawk a ni.
MPSC thuchhuah chuan “Recruitment process-ah chuan advertisement leh application submission hun bithliah hi candidate tin tan a thuhmun vek tûr a ni. Application hun khar hnuah candidate thenkhat te tan document kim lo thehluh hun hranpa siamsak leh hi candidate document felfai taka thehluttu te tan thil dik lo (fair lo) tak a ni dâwn a, India Dânpui-in a phût ‘equal opportunity’ leh ‘equal treatment’ bawhchhiatna a ni bawk ang,” an ti a. Hna diltute chu Written examination-ah eng ang pawhin ti tha mah se dilna famkim lo thehlut te chu eng hunah pawh hnawl theih an nih thu leh chu chu Advertisement-ah pawh langsâr takin ziahlan zel a nih thu sawiin, Supreme Court in thutlukna a lo siam tawh ah a hnuah document thar pek belh emaw, re-submit emaw theih a ni lo tih tarlan a nih tawh thu leh hei hi MPSC chuan a zâwm mai zawk a nih thu an tarlang a ni.
Hei bakah hian MPSC-in Online Portal thar (Version 2.0) a hman tan hun chu June ni 13, 2025 a nih thu MPSC thuchhuah chuan tarlangin, June ni 16, 2025-ah Portal thar zirchian nan hun hmangin June 17, 2025-ah Portal thar hman dan tur – Account hawn thar dan, OTR siam dan, document upload dan etc. chungchanga applicant te kaihhruaina (public notice) chu Media hrang hrangah tihchhuah a ni tih an tarlang a, Portal thar chungchanga kaihhruaina vawi thum (3) dang tih chhuah leh a nih thu an tarlang bawk.
MPSC tihchangtlunna atan sawrkar pawhin hma a lak mek thu sawiin, “MZP hruaitute pawhin OTR hi an ngaihven êm avangin anni nen pawh sawihona leh demonstration te pawh neih a lo ni tawh a. An duhdan rawn thlen te pawh a theih chin chinah tih hlawhtlin a niin, MPSC online portal pawh nasa taka tih changtlun chhoh zel a ni. Tuna buaina awm mek ang chi hi chu hun reilote hnuah chuan kiang thuai tura beisei a ni,” an ti bawk.