MZP-in Hnamdang pasal neite chungchangah an ngaihdan ala ngai reng tih an sawi
MZP General Hqrs. hian nimin khan Executive Meeting vawi 655-na chu an President Dr. C. Lalremruata kaihhruaiin Aizawl-a MZP Conference Hall-ah an nei a, MZP in kum 2015 atanga September ni 2-a a lo hman thin, ‘Hnamdang nupui/pasal nei lo tura inzirtirna ni’ chu kumin pawh hian hman leh nise, School hrang hrangah thusawina hun hman leh nise an ti a. Tunhnaia Mizo hnam dan, The Mizo Marriage & Inheritance of Property Act, 2026 Supreme Court hial a khing duhtu Mizo Nu ni thin, hnamdang pasal nei ta chu an dem takzet tih sawiin, “Kum 2015 atang khan MZP chuan hnamdang nupui pasal neilo tura inzirtirna a lo hmang tawh thin a, Kum 2023 MLA Election dawnah pawh Political party tin te hnamdang pasal nei Ticket pe lo turin alo ngen tawh a, tuna Supreme Court-a khingtu hi Political party pakhat in MZP te ngenna zahlo in Ticket an pek luih avangin Aizawl khawchhungah kawngzawh pawh MZP hian alo buatsaih tawh a ni,” an ti a. “Hnamdang pasal neite chungchangah hian MZP chu a ngaihdan a la ngai reng a, Political party hrang hrangte pawh heng mite hi eng inthlan ah pawh thehchhuak lo turin a ngen nawn leh a ni,” an ti bawk.
Nimin-a MZP thukhawm hian Tlabung khua chu hmanlai atanga tun thlengin Mizote khua a ni tih tarlang bawkin, Tlabung chu Chakma-te khaw hlun leh an lo luahlum tawh thin anga sawi awm chu an pawm lo tih an sawi a, thangtharte rilru-a history dik lo tuh tumna leh Mizoram mipui zahlohna ah an ngai tih sawiin, “Mizo Lal te'n an ram leh an ram luah chinte an humhalh nasat em avangin eng ti kawng mahin Tlabung chu Chakmate khua a ni thei ngai lo a ni,” an ti.
MZP chuan kumin-a ‘Zirtirtute Ni’ lo thleng turah kumtin-a an tih thin angin Zirtirtute zahna thuziak Aizawl chhung hmun hrang hrangah tar leh nise an ti a, hei bakah hian August 31-a MZP rorelna sang ber dawttu, Federal Council vawi 61-na neih tur atan Agenda thlifimin Agenda 11 chhawpchhuah nise an ti bawk.