KPP Intawhkhawmna atan inrawnkhawmna neih a ni

Kumin October 16 atanga 18 chunga Serchhip khua in ‘Rampum huap Kohhran Pavalai Pawl Intawhkhawm’ a thlen tur atan nimin khan Inrawnkhawmna neih a ni.
Serchhip Kawnpui Kohhran Diamond Jubilee Hall-a Inrawnkhawmna ah hian PCI Serchhip Pastor Bial, New Serchhip Pastor Bial leh Serchhip Vengchung Pastor Bial huamchhunga Kohhran hrang hrang, YMA, MHIP, MUP leh thuthar thehdarhtute telin Organising Committee Vice Chairman, Pastor K. Ramdin-thaar chuan a kaihruai a, Organising Chairman Upa Vanlalchhunga chuan KPP Intawhkhawm neih tur atana an inbuatsaihna hrang hrang sawiin, Organising Committee hnuaiah Sub-Committee paruk (6) indinin Budget atan Rs. 50,10,000/- ruahman a a ni a, Synod atangin cheng nuai 30 hmu tawhin a bak chu Pastor Bial pathum te hian an tuak dawn a. He intawhkhawm neih turah hian a hrana sawrkar hnik an tum loh thu leh rampum huap intawhkhawmna tur a nih avangin Presbyterian Kohhran chauh lo, Kohhran hrang hrang te chu thawhhopui ah a sawm bawk a ni.

He hunah hian Organising Committee Patron leh Serchhip Bawrhsap, Paul L. Khuma pawh telin KPP Intawhkhawmna tura Kohhran hrang hrang, NGO leh Media mite thlenga thawh-hona tha awm chu sawrkar tan pawh entawntlak a nih thu a sawi a. District Urban Development Officer (DUDO) Gaston Vanlalhriatpuia pawhin he Intawhkhawm hmang tura Palai rawn kal ten ‘Serchhip chu khaw fai tak a ni’ tih an puak haw theuh theih nan theihtawp chhuah tlan a tul thu a sawi bawk.

Rampum huap Kohhran Pavalai Pawl Intawhkhawmna neih tur atan hian Pandal sak hna pawh nimin khan thawh chhunzawm leh a ni a, nimin zing khan Pastor Bial pathum-a KPP te chuan hnatlang neiin Pandal ruangam hi chawlhkar khat chhunga zawhfel hman an tum thu he hna thawktute chuan an sawi a ni.