MIGAHTA-in Vawiin atangin Mass Casual Leave lak an tum

Mizoram Govt. Adhoc Aided High School Teachers’ Association (MIGAHTA) chuan nimin khan sawrkar Notification halin Vawiin atang hian tiamchin awm lova Mass Casual Leave lak an tum thu an sawi bawk.

Mizoram Govt. Adhoc Aided High School Teachers’ Association (MIGAHTA) hian sawrkar laka lungawi lohna lantirin July 29, 2026 khan Aizawl-a Vanapa Hall kawta sit-in demonstration neiin MZP palai-na hnuaiah, Education Minister hriatpuinain Adviser to CM (Political) leh ZPM Vice President Lalmuanpuia Punte hovin an inkawm a. An chungchang rel hun tur an ngaihchan lai leh an ngen anga Adhoc High School-te dinhmun hniama an tlakna tur Category S-1 notification tichhuak lo tura an ngaih laia Notification tihchhuah hnan an ni chu duh lohna entirnan he Notification hi nimin khan Mizoram hmun hrang hranga Adhoc High School 90 chuangah he Notification hi an hal ta a ni.

Nimin-a MIGAHTA Executive Meeting chuan Provincialised dinhmuna dah let tura sawrkar an phut thu sawiin, tuna an dinhmun Adhoc-Grant-in-Aid atanga dinhmun hniam zawk Lump-Sum-Grant-Aid (Category S-1)-a sawrkarin a dahna Notification August 4, 2026-a a tihchhuah tawh chu cancel a nih hma chuan Vawiin, August 6, 2026 atangin tiamchin awm lovin Mass Casual Leave lak an tum thu an sawi a. School dinhmun hniam zawka dah an ni chu an pawm thei lo tih sawiin, Provincialised an nih hnuah Adhoc-Grant-In-Aid dinhmuna an dahthla mai pawh duhtawk lova, a aia hniam Lump-Sum-Grant-In-Aid/S-1 dinhmuna an dah thla lehzel chu na an tih thu leh a tawp thlenga do zel an tum thu an sawi a. Naktuk August 7, 2026 hian School dinhmun tlakhniam tir a nih chungchangah Managing Committee, VC leh All NGO te nen Joint Meeting nei turin ruahmanna an siam bawk.