MSU in MPSC chungchanga rawtna CM hnenah an thlen
MSU hruaitute chuan Chief Minister hnenah hian MPSC-in tunhnai kumkhat leh a chanve chhung hian tihsual siamthatna (Corri-gendum) vawi 16 chuang zet an chhuah tawh tih sawiin, hemi avang ringawt pawh hian MPSC hna lak danah felfai tawk lo awm nia a lan avangin zirlaite leh hna zawng mek ten harsatna an tawh hrang hrangte sutkian anih theih nan rawtna an thlen tih an sawi a. MPSC Online - One Time Registration (OTR) chungchang ah August 10, 2026 thlenga One Time Registration (OTR) hmanga document upload tawh te chu (document lem a nih loh chuan) pawm sak vek an phut thu te; MPSC online-a hna dilna submit tawh, OTR-a document submit kim lo palh awm te chu Offline/Office verification hmangin document endik sak leh Document an neih kim chuan pawm sak an duh thu te; OTR hmanga hna dil tura in register tawh document upload kim lo zawng zawngte tan zau taka puangzar in kar hnih (2 weeks) chhung update theih hun hawn sak an duh thu te; MPSC Online OTR hman mekah tihsual a awm tawh loh nan enthat a, tih changtlun an duh thu bakah MPSC hnuaia hna lak dan chhui chiangtu tur leh rintlak zawk a siam a nih theih nana rawtna siam tur High Level Inquiry Commission' din-a an hmuhchhuah leh rawtna te mipui-ah puanzar an duh thu te an thlen a ni.
Heng bakah hian MPSC tihchangtlunna atan Controller of Examination pahnih siamin Controller of Examination-I in Group-A & Group-B Gazetted hna lak leh kaisan zawng zawng buaipuiin Controller of Examination-II in Group-B Non-Gazetted chin hnuailam hna lak leh kaisan zawng zawng buaipui se an duh thu te an thlen bawk.