Mizoram-a Tipper-a eizawng pawl pathum ten State pawn atanga Balu phurlut tur an dang

Zonuna Kawlni (LENKAWL) • August 3, 2026 • Comments • Mizoram

Mizoram-a Tipper khalha eizawng pawl pathum inthurual chuan State pawn atanga Mizoram-a Balu phurluttu lirthei te chu Inrinni atang khan an dang a, hetianga Balu phur an dan avang hian Mizoram-ah Balu man a to phah dawn loh thu an sawi bawk a ni.

Mizoram-a Tipper neitu leh a khalhtu pawl pathum - All Mizoram Commercial Tipper Association (AMCTA), Mizoram Tipper Association (MTA) General Headquarters, Aizawl leh MTA Kolasib District te chuan an lo puan lawk tawh angin Inrinni kalta, August 1, 2026 atang khan State pawn atanga Mizoram-a Balu phurluh an rem tih tawh loh thu an sawi a. Hemi ang hian Duty pawh insiam nghalin chhun zan zawmin Balu phurluh dangin an duty zel dawn tih an sawi a. AMCTA leh MTA General Headquarters, Aizawl Member te chu Phunchawng ramchhung MTA, Site Office kawt-ah an duty a, MTA, Kolasib District Member te pawh Kolasib Tuitha Veng-a MTA Office-ah an duty bawk a ni.

Tipper khalha eizawng pawl hruaitute chuan State dang Balu Mizoram-a lak luh an rem tih tawh loh chhan chu Mizoram mi Assam chhunga Balu phur Mizo Driver ten enhran an tawh vang te, Bagha leh a chhevela Balu te chu tha tawk lo, Acid tam leh him lo nia an hriat vangte a nih thu an sawi a. Tunhnaiah an pawl member 4 te chu Assam sawrkar thuneituten dan lova Balu phur ah puhin an lo man tih sawiin, sum tam tak an chawitir thu leh hetianga an member ten harsatna an tawk hi pawi an tiiin an lungawilo hle tih te an sawi a. Hei bakah hian Hnamdangin sumdawnna kawnga Mizote an chimral mekna titawp tura hmalakna atan State pawn atanga Balu hi lakluh remti ta lo an nih thu an sawi a ni.

MTA General Headquarters hruaitute chuan State pawn Balu phur hrim hrim chu Mizo lirthei pawh nise dan vek an tum thu an sawi a, State dang,a bikin Assam Balu te Mizorama phurhluh a rem loh avang hian Mizoram-ah Balu man a to phah dawn lo tih sawiin, Mizoram chhunga In sa mekte chu lo lungngai lo tura chahin. Bagha balu aia tha zawk Langkaih balu lak tur a tam thu an sawi bawk.