Serchhip-ah District Level Panch Sammelan neih a ni
Serchhip BDO Conference Hall-a District Level Paanch Sammela ah hian Bawrhsap leh VB-G RAM G-a District Programme Coordinator Paul L. Khuma chuan sawrkar laipuiin ruahmanna a siam thar VB-G RAM G chu mipui inhlawhna mai piah lamah kan khawtlang tana hmasawnna ruhrel dinna atan hman tangkai a tul thu sawiin, “Mi tinin kan tih tur theuh kan tih hian sawrkar programme chu a hlawhtling mai thin a ni,” a ti a. Kan hlawhtlinna tehfung atan 'kan hnathawh ten mipui tan rah tha a chhuah em?' tih hi kan hman thin a tul thu pawh sawiin, he huna kalkhawm Serchhip District chhunga Village Council tin aiawh leh Field Staff-te chu Serchhip District chu District entawntlak ni tura tan la turin a ngen bawk a ni.
Nimin-a District Level Paanch Sammelan hi Serchhip DRDO Project Director Dr. Malsawm-tluanga Fanchun chuan kaihruaiin VB-G RAM G chu a bultan that a pawimawh thu a sawi a, “A bul kan tan fuh loh chuan nghawng tha lo tak a nei ang tih a hlauhawm a ni,” tiin “Kan hna thawh hian kan khawtlangah eng ang takin nge hlawkna a thlen tih hi kan ngaihtuahna ah awm reng se,” tiin he huna kakhawmte chu a chah bawk a ni.
District Level Paanch Sammelan-ah hian Serchhip DRDO-a ARDO Stephen Laltlansanga Auhmun chuan VB-G RAM G kalpui dan tur chung-changa hriattur pawimawhte a lem nena entirin a sawi bawk a. VB-G RAM G hmathlir leh thil tum bakah he Dan hnuaia Panchayati Raj Institution-te mawhphurna leh chanvo te, VB-G RAM G hnuaia chhungkua in register theite, hmasawnna programme lo awm sa tawhte nena thawhho dan turte, thil dik leh langtlang taka mipui hmaa chhawp-chhuah dante an zirho a ni.