Mizoram leh Assam ten boruak ralmuang tak an siam zel a tul thu Chief Minister in a sawi

Chief Minister Lalduhoma chuan Mizoram leh Assam chu kawng tinrenga in mamawh tawn kan nih avangin boruak ralmuang tak siam zel a tul thu a sawi.

Chief Minister Lalduhoma hian nimin khan Guwahati-a Assam Royal Global University-in Student Induction Programme - Deeksharamb an buatsaih chu khuallian nia hmanpuiin Mizoram chu Assam State atanga indang kan nih thu sawiin, “State inthenawm kan nih angin thil tam takah kan inmamawh tawn a, hmasawnna kawngah tum thuhmun neiin kan kal a, mihring pawh kan inkalpawh tam a. Assamese tam tak Mizoram-ah an cheng a, chutiang bawkin Mizo tam tak Assam-ah an khawsa mek a ni,” a ti a. “Kawng tinrenga in mamawh tawn kan nih avangin boruak ralmuang tak kan siam zel hi a tul a, Assam Chief Minister nena kan inkawm tum pawhin kawng tinrenga boruak tha siam dun chu tha kan ti a ni,” a ti. Chief Minister chuan he huna Zirlai naupang kalkhawmte chu hlawhtling taka University kal chhuak vek tura duhsakna hlanin, Mizoram atanga he University-a lutte chu Zo nun ze mawi chhawmnung chunga zirlai tha ber ber nih tum turin a chah bawk.

University chu zirna hmun satliah ni lovin mi puitling ni tura kawng hrang hranga inchherna hmun, Culture hrang hrangte intawhkhawmna, mihringte inzahtawnna leh khawsakho thiamna zirna hmun a nih thu Chief Minister chuan sawiin, “He University hian chu chu a ngaihlu tih ka hria a, Convocation lo awm leh tura a thupui (theme) turah pawh ‘Mizoram’ tih chu a hmang dawn tihte ka lo hria a. Chuvangin, zirna hmun tha a nih bakah hnam inpumkhatna leh mihring inunauna zirtirna tha tak a ni,” a ti a. India ram vanneihna chu thalai kan ngah hi a nih thu pawh sawiin, “Kan thalaite hi kan chakna hnar (power house) in ni. Kan ram leh hnam chawisang zel turin tunlai thiamna thar ber berte lo zir ula, hmathlir thui tak neiin inbuatsaih sauh sauh rawh u. Thangtharte kaihhruaina kawngah University hian mawhphurhna tam tak a nei a, RGU pawh hi lo tang zel se, India leh hmarchhak mipuite tan malsawmna lo ni zel rawh se,” tiin duhsakna a hlan bawk.

Assam Royal Global University hi kum 2017-a din niin tunah hian Academic programme 130, Faculty 500 vel neiin zirlai naupang pawh 9000 chuang an nei a. Foreign student pawh ram 28 atangin mi 400 chuang an nei mek a. Assam State-a University tha ber pawla ngaih niin Dr. AK. Ansari chu Chancellor a ni a, Prof. Dr. Alak Kumar Buragohain chu Vice Chancellor a ni. Kumin-a Student Induction Programme hi ni 19 chhung awh turin an kalpui mek a, ram hrang hrang 28 atanga kalkhawm zirlai tharten University an hriatchian theih nan te, an zinga inpawhna tha a awm theih nan te he hun hi an hmang a ni.

Chief Minister hian University hmunhma a en kual bakah Mizoram atanga he University-a kal naupangte nen an inkawm nghal bawk a ni.