Mizoram Govt. Adhoc Aided Middle School Teachers' Association ten lungawi lohna lantir tan
.jfif)
Nimin a thuchhuah an siamah Mizoram Government Adhoc Aided Middle School Teachers' Association chuan Mizoram sawrkar chuan Mizoram Education (Provisional Adhoc Grant-in-Aid for General Maintenance of Private School) Rules, 2025, (No. A-11015/10/2025-EDN, Aizawl, the 15th July, 2026) chu tichhuakin, he Rules hian Deficit Grants-in-Aid Schools, Adhoc Grants-in-Aid Schools leh Provisional Adhoc Grants-in-Aid School-te a huam thu an tarlang a. He Dan thar hi ngun taka a zirchian hnuin zirlaite leh School tan ngei pawh thil thalo tam tak, tun leh hun lo kal zel turah thlen thei tur Dan nia an hriat thu an sawi a. The Right of Children to Free and Compulsory Education Act, 2009-in naupang kum 14 leh a hnuailamte hmangaih leh duhsak taka kilometre thum (3) aia hlaa Middle School (Upper Primary) zirlaite School kal lo tura a tih mek laia Sawrkarin an dinhmun phet thlaa dinhmun hniam zawk leh School pawh khar mai thei dinhmuna dah a tumna chuan naupang School kalna pawh hla tak tak ni thuai mai thei dinhmunah a dah zui ta nia sawiin, hei hi Elementary Education dah pawimawh tawk lohna leh RTE Act ngaihpawimawh tawk lohna leh palzutna ah an ngai tih an sawi.
Hei bakah hian Sawrkar hmasain October, 2023 atanga hman tan tura dinhmun tha zawka a dah tawhna a thiah sak hnuah Dan chhe tak mai, tuna an dinhmun mek, Adhoc Aided dinhmun pawh tlukzo lo tur dan, thlir thuaka that hmel tak, zirchiana tha hauh si lo ‘The Mizoram Education (Lump-Sum Grants-in-aid for General Maintenance of Private School) Rules, 2026’ chu barhluih a tum nia sawiin, “Dan tha lo tak a nih avangin kan duh lo takzet a, pawm theih tur chi ah kan ngai lo,” an ti a. “Govt. School leh zirlaiten an dawn ang hamthatna hrang hrang heng- Composite School Grant, Library Grant, Sports Grant, Eco Club and Youth Club Grant, Uniform Grant leh hamthatna dang dangte, School leh School naupang ten kan dawn ve theih hun tur nghakhlel taka kan thlir ve thin chu engtikah mah dawng ve thei ngai lo tura min siamtu Dan a nih dawn avangin pawm theih chi ah kan ngai lo,” an ti.
Heng te avang hian sawrkar hmasa in a lo dah tawhna (Provincialised) humhim tur leh sSchool, zirlai leh khawtlangin hamthatna an dawn tawh, an hloh leh tak hmulet leh ngei turin hmalakna tur an ruahman tih sawiin, August 3 atanga 7, 2026 chhung hian Member zawng zawng ten Badge dum bel tur a nih thu leh August 10 atanga 12 chhungin Badge dum bel chunga Pen down Strike/No Teaching Day hman leh tur a ni tih an sawi a, “Heng pahnihte hian kan beisei ang a thuneitute a ko eih zo lo a nih erawh chuan August 18, 2026 hian Member zawng zawngte Aizawl khawpuiah kan kal zel dan tur ngaihtuah a kalkhawm tur a ni ang,” an ti bawk.