Mizoram Assembly thutkhawm tluang taka zawhfel a ni

Mizoram Legislative Assembly thutkhawm chu ni hnih chhung neih a nih hnuah nizan hmasa khan zawhfel a ni ta a, Speaker Lalbiakzama chuan thutkhawm hi tiamchin awm lovin a titawp a ni.
Thutkhawm tihtawp a nih hma hian Speaker Lalbiakzama chuan tun Session neih-a dinhmun tlangpui sawiin, tun tum hi 9th Legislative Assembly-a thutkhawm vawi 7-na a nih thu sawiin, thutkhawm ni hnih neih a nih thu a sawi a. Tun tumah hian House chhunga chhan nghal chi zawhna (Starred question) lut 300 atangin 295 pawm a nih thu leh zawhna pali chu hnawlin hnuhkir pakhat a awm thu a sawi a. Ziaka chhan chi (Un-Starred question) lut 73 zinga 72 chu pawm niin zawhna lut zingah Starred leh Un-Starred Question chhan loh 22 a awm a ni. Tun tum Session-ah hian Committee hrang hrang Report 9 chu House Dawhkan-ah pharh niin sawrkar lehkha pawimawh House Dawhkan-a pharh 15 a awm a, Official Resolution pakhat lut chu pawm a nih bakah Sawrkar Bill lut 12 zinga paruk te chu pawm a ni a, Speaker chuan Bill hi engtik lai pawha dawn theih a nih thu sawiin, tun tumah hian paruk chi ngaihtuah tura chhawpchhuah a nih thu a sawi bawk.

Heng bakah hian Speaker Lalbiakzama chuan Member te atanga Motion lut pakhat chu lungrual taka pawm a nih thu sawiin, Calling Attention Motion pulut Member pahnih an awm thu leh hun hmantir an nih thu a sawi a. Assembly Financial Committee te Term a tawp avangin Committee thar dinna tur Motion chu pawm a nih thu a sawi bawk.