Mizoram-ah Kal (kidneys) thlakna tih theih thuai beisei a ni

Taksa peng a thlawnna pek pawimawhna inzirtirna ni, Indian Organ Donation Day vawi 16-na chu nimin khan Mizoram-ah pawh hman niin Mizoram-ah Kal thlakna tih theih thuai beisei a nih thu tarlan a ni.

Indian Organ Donation Day pual hian Aizawl-ah chuan Directorate of Hospital & Medical Education Auditorium-ah Mizoram State Organ & Tissue Transplant Organisation leh Directorate of Hospital & Medical Education buatsaiha hun hman niin 'Organ Donation Life-Saving Campaign (Aangdan - Jeevan Sanjeevani Abhiyaan)' tih chu thupui atan hman a ni a, he hun hmanpuitu Health & Family Welfare Department-a Principal Director Dr. Lalthlengliani chuan he ni thupui chungchang sawiin, Pathian in mihringte chu an thih hnu thleng pawha theihna leh malsawmna a dah tamzia hriatchhuah tirtu nise a duh thu a sawi a; ram chhungah Organ thlak ngai tam lam leh a petu tur (Donor) record atanga a lan dan chhutin, a mangan thlak tih a sawi a, chu chu Mizoram Sawrkar pawh hian ngai pawimawhin, hemi kawnga Health Care Facilities thuamchak turin Sawrkar laipui nen tangkawpin, hmalak mek a nih thu a sawi.

He hunah hian Aizawl Civil Hospital-a Surgeon Dr. Zothansanga Ralte chuan Organ Donation chungchang sawifiahin, mi pakhatin a thih hnuah a taksa peng hrang hrangte hmangin mi pariat nunna chhanin, mi 75 tan nun nuam leh hahdam zawk a thlen thei tih a sawi a. India ramah a mamawhte hnena taksa peng pek chu an tlem thu sawiin, “Taksa pengah hian Kal, Thin, Vun leh Ril leh adangte chi hrang hrang inpek theih a ni a; India ramah hian Kal bikah kumtin Kal thlak ngai mi nuai 2 vel an awm a, mahse mi 7,500 atanga mi 10,000 vel chauh thlak sak tur nei an awm thin a, kumtin zaa 5 vel bakin Kal thlakna tur an hmu lo tihna a ni,” a ti.

Mizoram-ah pawh Kal thlakna hi tih theih thuai beisei a nih thu Dr. Zothansanga chuan sawiin, “Mizoram in helama thiamna nei Doctor (Nephrologist) a nei a, Civil Hospital Aizawl-in license a nei a, Surgical Team pawhin training an nei mek,” a ti a; Thin thlakna tur pawhin a thiam bik (Gastroenterologist) pakhat awm tawhin, Surgical Team erawh an la awm loh thu a sawi bawk.