Minister in Ministry of DoNER hotute kawm

New Delhi-a cham mek Mizoram sawrkar-a Minister of State Lalnghinglova Hmar chuan nimin khan Ministry of Development of North Eastern Region (DoNER) hotute kawmin Ministry hnuaia Mizoram project hrang hrangte chak zawka kalpui dan tur a sawipui bakah hmasawnna kal mek leh hmachhawp te an sawiho.

Tourism Minister Lalnghinglova Hmar hian MDoNER-a Secretary Katikithala Srinivas chu a Office-ah kawmin Mizoram sawrkar hmachhawp hrang hrangte DoNER Ministry kaltlanga hma lak theih dan an sawidun a. A bikin Sports leh Tourism-a hmachhawpte tarlangin Minister chuan, “Aizawl hi India ram Thlasik khawpui ni thei turin hma kan la mek a, December thlaah Winter Festival lian tham buatsaih kan tum. Kan theihnain a tlin piahlamah chuan Ministry puihna kan mamawh dawn a ni,” a ti a. NESIDS-OTRI hnuaiah Mizoram combat sports zawng zawngte hman theih tur ‘Centre of Excellence’ project sanction a ni chu lawmawm a tih thu a sawi bawk.

DoNER Secretary chuan a theihna apiangah Mizoram pui turin Ministry a inpeih tih Minister chu a lo hrilh a. “Mizoram chu ziak leh chhiar tamna, sik leh sa nuam leh hmun mawi tak a ni a. Zirna In tha din leh a awmsate tichangtlungin, ‘Education hub’ ni turin theihna a nei,” tiin, State pawn atanga zirlaite’n an pankhawm chuan khawtual mite eizawnna leh State economy thlengin a hlawkpui theih tur thu Minister nen an sawidun a ni.

Minister chuan DoNER Ministry hnuaia Tourism project thehluh chungchangah a buaipuitu Dr. Vipul Aggarwal, Joint Secretary leh Dharmvir Jha, Statistical Advisor te pawh kawmin, project dinhmun leh State sawrkar atanga hmalak ngai awmte sawipui a, bawhzui ngaite an bawhzui nghal a ni. Mizoram football hmasawnna tur project thehluh tawh dinhmun pawh an sawiho nghal bawk.

Sports Minister ni bawk Lalnghinglova Hmar hian NESIDS-OTRI Scheme hnuaia ‘Boxing Centre of Excellence’ sak tur chungchangah scheme enkawltu Silabhadra Das, Deputy Secretary pawh kawmin, chak zawka hmalak dan tur a sawipui nghal a. Contact sports hrang hrang hmunpui ni thei tur, cheng vbc. 38.4 senga sak tur Centre of Excellence hi May 19, 2026 khan sanction a ni a, tunah hian Tender chhuah tura buaipui mek a ni.