Minister hovin National Sports Day 2026 hmang
India infiammi ropui Major Dhyand Chand-a piancham August ni 28 hriatrengna atana kum 2012 atanga hman ‘National Sports Day’ chu Mizoram infiammite hma lam pan tura tan an lak thar ni ni se a duh thu Sports Minister chuan sawiin, hun inher mil zela inzir thar zel tur leh theihtawp chhuah turin infiammite chu a fuih a. National Games-ah leh India ram pum huap inelnaah te Mizoram a hnu dala kan tang fo mai chu a ngaimawh thu sawiin, Sawrkar pawhin theihtawp a chhuah mek zel thu leh infrastructure tha kan mamawh rualin kan neih ang chhun chhun te hman tangkai a tul thu a sawi bawk a. State dangte hnunga tawi reng lova mite ruala hmasawn tum tur leh hmasawnna tura rawtna an neih apiangte hotute hnena thlen zel turin infiammite a sawm bawk a ni.
Nimin-a he hun hman hi SYS Director Henry C Lalrawnkima chuan kaihruaiin SYS Deputy Director(G) C Lalmalsawma’n Technical report a pe a. STC Centre-in-Charge Elizabeth Lalnunmawii Colney kaihhruaiin kalkhawmte hian an taksa leh rilru hriselna ngai pawimawh tur leh infiamna chawisang a, an chhungte leh an thiante pawh infiamna lama tui tura fuih turin thutiam an la rual bawk a ni.
National Sports Day lawm nan hian Sports & Youth Services Office hrang hrang - Secretariat, Directorate leh MSSC, KISCE, NCC, NSS, SAI leh infiammite chu Group paliah inthenin infiamna chi hrang hrang: Futsal (Men), Volleyball (Women), Arpa Insual (Men), Inkawibah (Women), Dodge Ball leh Dart Throw hmangte in an intihsiak a, chawhnu lamah lawmman semna neih nghal a ni.