MIGAMSTA ten a huho-a chawlh lak an titawp

Mizoram Government Adhoc Aided Middle School Teachers' Association chuan Provincialise phûta sawrkar kar nana tunkar Thawhtanni atanga Nilaini thleng Mass Casual Leave an lak chu School Education Minister Dr. Vanlalthlana ngenna angin nimin khan an titawp a; Education Minister ho hian karleh Nilaini khian an thilphutte sawihoin an thukhawm ang.

Adhoc Aided Middle School Zirtirtute hian thuchhuah siamin, tun thla ni 3 atanga kawng hrang hranga provincialise phuta sawrkar laka lungawi lohna an lantir chu School Education Minister ngenna angin tihtawp rih a ni tih tarlangin, tun thla ni 19 khian Education Minister ho a Meeting neih leh tur a ni dawn a, chumi thu a zir chuan hmalak leh tur a nih dawn avangin member-te lo inkau sa theuh tura ngen leh hriattir an ni tih an sawi.

Tarlan tawh angin Adhoc Aided Middle School Zirtirtute hian an thilphutte tihhlawhtlin ngiatin tun thla ni 3 atanga ni 7 chhung khan Badge dum belin School an kai a, sawrkar lam atanga thu lawmawm an dawn loh avangin tunkar Thawhtanni atanga Nilaini thleng khan Mass Casual Leave an la a ni. Mizoram Govt. Adhoc Aided Middle School Teachers' Association-ah hian Mizoram hmun hrang hranga Middle School 44 atangin Zirtirtu 270 an tel a; kum 2023-a sawrkarin provincialised dinhmuna a hlankai tawh ang ngeiin an vaia provincialised-a hlangkai leh vek turin sawrkar an phût a ni.