MZP-in MPSC zahawmna humhim leh hnazawng mek te tana rintlak anih zel an duh thu an sawi
Nimin-a thuchhuah an siamah MZP General Hqrs. chuan Mizoram Public Service Commission (MPSC) a buaina tam tak awm avanga siamthat hnatlang ni nga (5) chhung a neih hnuah Mizoram Sawrkar hnena MZP ngenna DP&AR changtu Chief Minister zahawm takin ngaipawimawh a Reform Committee, ‘Committee to review the recruitment framework and process for public recruitment in the Government of Mizoram’ a dinna Order a chhuah chu lawmawm an tih thu tarlangin, “He Committee Chairman-in MZP leh Aspirant te chu an lungawi lohna zawng zawng leh MPSC a siamthat ngaite ziaka Committee-ah thehlut tura a sawm angin thehluh a ni dawn a. Chung an thehluh point hrang hrangte chu he Committee-in thla hnih (2) chhungin zirchiang in, recommendation a siam dawn a, chung te pawh MZP chuan a vil zui zel dawn a ni,” an ti.
MZP chuan he Committee-ah hian beiseina sang tak an neih thu pawh sawiin, “Candidate te harsatna tawh mek chungchanga Chief Secretary in One Time Registration (OTR) bikah helpline siam a nih tur thu alo sawi tawh chu lawmawm kan ti a, Meeting-a DP&AR Secretary-in a sawi chhuah ang ngeia applicants ten OTR-a harsatna an neih zawng zawngah tanpui ngei tur leh candidate tumahin harsatna an tawh zuiloh kan beisei bawk a ni,” an ti a. “Mipui leh Social Media hmangtu tam takin - mi tlemte harsatna avanga mi tam tak tawrhna thlen leh mi tlemte thiam loh avanga buaina siam anga MZP te puhna awm hi thil a nihna tak hre lo a, chhui peihloh vang leh engmah thu bulbal hre silo a sawi ve mai mai vangah kan ngai a. System tha ni sela candidate tumah hi an buailo ang a, equal opportunity candidate zawng zawng ten an nei thei ang,” an ti.
Hei bakah hian MZP chuan Court-a thubuai inchiah mek avanga engmah ti theilo anga MPSC insawifiahna leh tunah engmah tihdanglam ngawt a rem loh thu an tarlan chu mipui hruai kawi tumna a ni em tih kan zawt nawn duh tih sawi bawkin, “Nimin-a DP&AR Secretary kaihhruaia Meeting-ah heng Court case sub judice te hi specific case nge a nih a MPSC exam process zawng zawng tiha kan zawhna chu chhana mumal kan hmu theilo a, an Press Note-ah hian an thil hriatchianloh an chhuah ta mai em ni tih hi kan zawhna a ni,” an ti a. “MPSC zahawmna humhim leh hna zawng mek te tana rintlak anih zel hi MZP chuan a duh a, tun hnuah mipuia insawifiah leh midang dem ringawt loin, rintlak leh rinngam ni tura an insiamthat zel hi kan beisei tak meuh a ni,” an ti bawk.