Leilet bial-a Buh chinna ah Sangha no khawi dawn

Serchhip Mat Phai Zawlpui-ah Leilet-a Buh ching chunga Sangha khawina, 'Paddy cum Fish Cultivation' kalpui a ni dawn a, Zirtawpni khan Leilet-ah Sangha note chhuah a ni.
Serchhip Zawlpui Serchhip Agro Farmers Producer Society Ltd. ten Leilet bial-a Sangha no an khawi tur chhuahna hun hi Serchhip-a District Fisheries Development Officer (DFDO) Lalmalsawma chuan a hmanpui a, Sangha Dil nei kher lo tan pawh Leilet a Sangha khawi chu thil tha tak a nih thu sawiin, “Sangha in buh kung an han nawk chet te hi buhin a ngeih em em a, chutihrual chuan Sangha ek te kha leitha ah changin, buh kungin an ngeih em em mai bawk a, buh thar pawh a ti hlawk thei hial a ni,” a ti.

PMMSY Scheme hnuaiah Leilet-a Sangha khawi - Paddy Cum Fish Cultivation atan hian kumtin tanpuina dil hun hawn thin a ni a, a tui mite tan Fisheries Department-ah ngaihven theih a ni.