Larsap-in ruihhlo laka fihlim tura taksa leh rilru hriselna ngai pawimawh turin zirlaite a fuih
Nimin khan Aizawl-a St. Paul's Higher Secondary School-ah Nasha Mukh Bharat Abhiyan & Mission SPANDAN hnuaia Brahma Kumaris buatsaihin ruihhlo laka fihlim khawtlang siam tura hmalakna, ‘Addiction Free Society Campaign’ neih niin he hun hi Larsap General (Dr) Vijay Kumar Singh chuan khuallian niin a hmanpui a, ruihhlo leh a kaihhnawih chu ngaihven ngai tak, mitinte chawk buaitu a nih thu sawiin, ruihhlo ngawlvei awm lohna khawtlang kan siam theih phawt chuan danglamna nasa tak a thlen dawn thu a sawi a. India ram chu thalai tamna a nih thu pawh sawiin, nakin lawka India innghahna ni mai tur thalaite chu ruihhlo bawiha an luh mai loh nan leh hrisel leh hnathawk tlak an nih theih nana kaihhruai an tul thu a sawi a. Mizoram chu ramri depa awm a nih avanga ruihhlo pawh a hluar phah thu sawiin, Cancer leh HIV Case tamna State kan nih avanga nasa lehzuala tanlak a tul thu a sawi a, “Inzirtirna, tumruhna leh thawhhona tha hmanga kan beih phawt chuan hengte hi kan hneh ngei ka beisei,” a ti bawk.
Larsap General (Dr) Vijay Kumar Singh chuan zirlaite chu ruihhlo laka fihlim tum tlat tur leh thlemna an tawh pawha hnawl ngam turte, hmakhaw eng tak an neih chu ruihhlo avanga chhiat tir phal lo turte in a fuih a. Nu leh pa leh zirtirtute thahnemngaihna leh beiseina tihlawhtlingtu nih tum tlat tura chahin, “Hmabak eng tak in neih avangin inchunga h beiseina sang tak kan nei a. Chhungkua, khawtlang leh State hmakhua inchungah thui taka a innghah avangin tihnualtu ni lo ang che u,” tiin a fuih a. Zirlai kalkhawmte chu ruihhlo that loh zia hrechianga midangte zirtirtu (Ambassador) pawimawh tak an nih theih thu hrilhin, a zau thei ang ber puangzara entawntlak taka nung turin a chah a. Ruihhlo laka fihlim turin taksa leh rilru hriselna, exercise leh rilru sawrbingna ngai pawimawh turin a fuih bawk.
St. Paul's Higher Secondary School-a Ruihhlo laka fihlim khawtlang siam tura hmalakna, ‘Addiction Free Society Campaign’ neih ah hian St. Paul's Higher Secondary School Principal Brother Kuriyan M.S chuan inlawmna thu sawiin, Dr. Sachin Parab MBBS, Brahma Kumaris Headquarters, Mount Abu, Rajasthan chuan zirtirna a pe a, a kaihhruaiin Addiction-Free Pledge lak a ni a, vaihlo, zu, drug leh mobile phone ngawlveina laka filhim turin zirlai thahnem tak an intiam a, he hunah hian he School a zirlaite leh zirtirtute an tel a ni.