Khelo India-a State in chanpual nei dawn

Khelo India Scheme-a pawisa ruahman thin dan chu Union Cabinet chuan siamthain, kum nga (5) ruahman chhunga infiamna lam hmunhma hmasawnna project-ah State te chanpual atan cheng vbc. 565 dah hran a ni.

Kar kalta chho khan Union Cabinet chuan Khelo India Scheme atan hian cheng vbc. 29,054 ruahmanin Assistance to National Sports Federa tions Scheme (ANSF) atan cheng vbc. 7,387 a pawmpui bawk a. Khelo India Scheme pawisa hman dan thil chipchiar tarlangin Sports Ministry chuan, he Scheme huanga pawisa awm atang hian sawrkar laipui chan tur chu cheng vbc. 28,489 a nih laiin, State te chan tur zat chu cheng vbc. 565 a ni tih a sawi a. Ministry hian State tinte hnenah eng zat chiah nge an pek dawn tih erawh chipchiar takin a tarlang rih lo thung.

He scheme hman dan tur tharah hian State lian te tana hmunhma siamnaa sawrkar laipui leh state te pawisa thawh tur zat chhut dan chu 60:40 a ni ang a, zaa 60 hi sawrkar laipuiin a tum anga. Hmarchhak State, Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura te leh Himalayan State, Himachal Pradesh leh Uttarakhand te tan erawh sawrkar laipui hian he senso atanga za zela 90 (90%) a tumsak dawn a ni. Union Territory, Andaman and Nicobar Islands, Chandigarh, Dadra and Nagar Haveli and Daman and Diu, Delhi, Jammu and Kashmir, Ladakh, Lakshadweep leh Puducherry te tana infiamna hmunhma hmasawnna erawh sawrkar laipui hian a vaiin (100%) a tumsak thung anga. Sports Ministry Official chuan, “Hetianga then darh hi Khelo India Scheme hmasah khan a awm ngai lo a, hetianga siam a nihna chhan hi State te pawh he hnathawhah hian thawhpuia siamin, he project hi anmahni pual anga a ngaihtir nan a ni,” a ti.

Pawisa ruahman thar hi a hmaa Khelo India Scheme puala pawisa ruahman thin ai khan a let 8 zetin a tam a, a hma lama Scheme-ah kha chuan sawrkar laipui hian sum tum tur hi a pumpuiin a tum a, State tan pawisa hranpa dah a ni lo a, mawhphurhna pawh pek a ni ngai lo a ni. Tunah hian infiamna hrang hrang 22-ah Khelo India Athlete chu mi 3,000 an tling tep tawh a, Sports Ministry chuan infiammi zat hi a tlem berah a let 9 zet a pun belh a, tha thar chherchhuah tur thahnem tak siamchhuah a beisei a ni.