India ram thendarh anih avanga mipuite harsatna tawh hrang hrangte hriatrengna ni hman a ni
Art & Culture Department buatsaiha ‘Partition Horrors Remembrance Day, 2026’ hman ah hian Larsap General (Dr) Vijay Kumar Singh chuan India ram thendarhna ‘Partition of India’ chu India ram chanchina hun hrehawm leh lungchhiat thlak berte zinga mi a nih thu sawiin, “Mipuite tawrhna nasa tak thleng chuan ram pum nasa takin a nghawng a ni,” a ti a. “Tun hi thinlung hliam tih nun thar tumna leh midang demna hun a ni tawh lova, khatih hunlaia mipui tawrhna te hre renga, an chhelzia ngaihhlut bakah hetiang thil duhawm lo hi kan ramah a thlen tawh loh nana kan intiam tharna hun a ni,” a ti a. Thendarh kan tawh avanga harsatna hrang hrangte sawiin, hemi avang hian mi maktaduai 10-14 vel mahni In lum kalsanin an pem darh a, chhungkaw inthen leh khawtlang pem runpuite thlengin pawisawi lo mi tam takin nunna an chan phah thu a sawi bawk.
Larsap chuan India thendarh chu pumpelh theih a nih thu leh India awptu leh tih chak loh duhtute avanga kal tlangpui anih tak dante sawiin, “Chawpchilh takin ramri kham a ni a, hei hian pawi thui tak, ser reh thei tawh lo a siam a, Chittagong Hill Tract then darh anih avangin Zo Chin thahnem takte pawh then hran an ni,” a ti a. India chu ram inpumkhat, kan nihna pawh thuhmun a ni tihah chiang tura he huna kalkhawm zirlaite chu chahin, kan inpumkhat tlatna hian hma lam min pan tir dawn a ni, a ti a. India-in tunhma zawng aia hmasawnna a hmuh nasat thu pawh sawiin, “Inhmuh thiamloh thinnate kan dah bova kan tanrual phawt chuan hmasawnna tam zawk kan hmu thei, danglamna kara kan inpumkhatna hi India chakna hnar a ni,” a ti a. Thalaite chu State leh ram pum tana tangkai leh innghahna tur an nih thu sawiin, thuthang dik lo leh ngaihtuahna hruai kawi thei laka fimkhur turin a chah a. India ram thil lo thleng tawhte ngaihvena fimkhur taka midangte hlan chhawng thin turte, zalenna, dawhtheihna, inunauna leh inzahtawnnate nunpui tlat turin a chah bawk.
He hunah hian Art & Culture Department-a Joint Secretary TC. Lalkhuma chuan kalkhawmte lawmna thu sawiin, Institute of Mizoram Fine Arts (IMFA) ten Mizo Musical Instrument hrang hrang hmangin ram leh hnam hla mawi taka an rem bakah Esther Hnamte, Awardee, Pradhan Mantri Rastriya Bal Puraskar-in ram leh hnam hla mawi takin a sa bawk a. India ram thendarh chungchang Short movie thlirho a ni a. Art & Culture Department Director, Carol VLMS Dawngkimi chuan lawmthu sawi-a hun kharin hemi hnu hian Larsap chuan hemi puala buatsaih Exhibition a tlawh nghal bawk a ni.