Serchhip District-a NH siamthat dinhmun thlirho a ni
Tunkar Nilaini khan Serchhip DC Office-a thawktute leh MJA Member te chuan Khumtung leh Keitum inkar kawng National Highway siam that hna thawh mek hi endikin heta an thil hmuh dan thlirletna hi nimin khan Serchhip DC Meeting Hall-ah neih a ni a. He hunah hian Serchhip DC Office-a SDC leh NH Line Officer, Chawngthu Lalrinhlua chuan tun tuma kawngpui an endikna atanga an thil hmuh dan tlangpui tarlangin, Package-I hmar lama Serchhip District atanga Mualkawi Bazar bul thleng leh Package-III Keitum atanga Bungtlang thleng te chu a tha thawkhat tih sawiin, KRAM Infracon Pvt. Ltd. te thawhlai, Package-II kawng siam erawhin duhthu a sam lo hle nia an hriat thu endiktute chuan an sawi a, KRAM infracon Pvt. Ltd aiawhte leh kawng siamtute chu a chhan leh a vangte zawhfiah a ni bawk.
He thutkhawm a tel khawtlang hruaitute leh tlawmngai pawl te chuan KRAM Infracon Pvt. Ltd te hmalakna chu an duhkhawp loh thu sawiin, huntiam chhunga an thawk tha lo emaw, an kut hnuin mit a tlung lo a nih chuan na zawk leh ngawrh zawka hma an lakzui tawh tur thu an sawi bawk a. Nimin-a thutkhawm kaihruaitu Serchhip Addl. DC Dorothy Muansangi chuan kawng tha kan neih theih nan mipuite kan tanrual a ngaih thu sawiin, mi tute pawhin hna thawh tha lo an hmuh chuan thla la a, thuneitute hnena hriattir thin turin a sawm nghal bawk a ni.
August ni 6, 2026-a Bawrhsap Paul L. Khuma hova thutkhawm ah he kawng siam that hna thawktu Contractor te chuan ni 15 chhunga kawng khuar chhe laite an hnawh phui vek tur thu an lo sawi tawh a. Hei hi an tihlawhtling lo a nih chuan dan angin an chungah hremna lekkawh a nih tur thu hriattir ni tawhin tun thla ni 21 khian Joint Inspection neih leh tura rel nghal a ni bawk.