Larsap in mipuite chibai buk

Mizoram Governor General (Dr) Vijay Kumar Singh chuan Vawiin-a Independence Day pualin Mizoram mipuite chibai bukin duhsakna a hlan a, “He hun lawmawm takah hian Mizoram that danglam bikna hrang hrang, khawtlang ralmuang, ziak leh chhiar tam, sik leh sa nuam, boruak thiang-hlim, Dan zawm tha leh khawtlang inpawh kan nihna te hi hmasawnna chak zawk thlena, Mizoram hmasawn Viksit Mizoram siam nan hman tangkai tum ang u,” a ti. Larsap chuan Mizoram chu nungchang mawi leh zahawm tak Tlawmngaihna lantirna ti a hriat hlawh a nih thu pawh sawiin, “Hei hi tunhnai furpui avanga leimin leh kawng chhe kara harsatna tawh tum te khan a taka hmuh theiha lantir a ni. Khualzin tangkhangte leh damlo puih ngaite hmangaih taka chhawmdawl an ni kha Tlawmngaihna vang liau liau a ni. Tha thawhtu zawng zawngte zahna chibai ka buk che u a, he thiltih ropui tak hi in chhawmnung zel dawn nia,” tiin Furpui kan hmachhawn mekah pawh tlawmngaihna chhawmnung zelin tanpui ngaite pui zel  turin mipuite chu a chah bawk.