Govt. Serchhip College in harsatna a tawh te sawiho
Govt. Serchhip College Principal Room-a an inkawmna hi MCTA Govt. Serchhip College Branch President, Vanlal-chanchinthahrilmawia chuan kaihruaiin College Principal, C. Laldintluanga chuan hetianga YMA hruaitute nen inkawmna tha tak an nei chu lawmawm a tih thu sawiin, YMA te pawhin zirna chu ngai pawimawh se a duh thu a sawi a. Nu leh pa tam takin kan fate Elementary School-a an kal lai-a kan ngaihtuah viau laiin an pawl a lo san hnuah kan thlahthlam leh mai thin nia a lan thu sawiin, College a kal thenkhat chu an nu leh pa te pawhin an ngaihsak loh mai bakah Class an kal leh kal loh te, result eng ang nge an neih pawh an hriatpui lutuk tawh lo nia a lan thu te a sawi bawk a ni.
He inkawmna ah hian MCTA Govt. Serchhip College Branch hruaitute chuan an College dinhmun leh harsatna an tawh hrang hrangte sawiin, an College-a Science Laboratory chu a Building a hlui tawh thu leh a tha tawh lo hle tih sawiin, mipui ten College ram chu Vantlang kawng atana an la hman avangin a him lo hle nia an hriat thu te, tunhnai lawk ah pawh Science Laboratory Tukverh tihchhiat niin heta tang hian an bungrua lo lachhuak an awm thu leh cheng sing riat man vel zet tihchhiat a nih thu te an sawi a. Hei vang hian College helna tur kawng siam tura ruahman chu tih hlawhtlin vat dan kawng zawn nise an duh thu an sawi a. Hei bakah hian Library Building hlui lutuk tawh chu sak thar an mamawh thu leh Lehkhabu neih belh pawh harsa khawpa an tawt tawh thu leh Bus an mamawh dan te pawh an sawi bawk a ni.
Inkawmna ah hian MCTA hruaitute leh Sub-Hqrs. YMA OB te telin College Building te hi an fang ho a, heng harsatna hrang hrang sutkian nana hmalak dan turte an sawiho nghal bawk.