Halpuah leh Halmawi khuahkhirhna dan pawm a ni
Nimin Assembly Session-a Bill sawi-hawnna ah Home Minister K. Sapdanga chuan, Halpuah leh Halmawi chu mihringte hriselna atan leh environment tan a tha lo a, boruak a ti bawlh-hlawh a, mihring hriselna atana nghawng tha lo tak a neih avangin Sawrkar leh tlawmngai pawl, mimal thahnem ngai ten tha an ti lo a, Mizoram Sawrkar pawhin kum 2008 atang khan a bikin hunpui, Krismas leh kumthar vuak vetah a lo khap tawh thin a. Mipui hriselna leh environment venhim chu State Sawrkar mamawh a nih angin sawrkar laipui Dan awmsa te zirchian a nih hnuah he Bill hi duan a ni ta tih a sawi a ni.
Home Minister chuan, He Bill hi mipuite chanvo, an hriselna tur te, boruak thianghlim an neih nan leh pheikhai rual taka khapna thupek kenkawh a nih theihna tura duan a ni tih sawiin, Supreme Court leh National Green Tribunal thupek awmze nei taka bawhzuina tura duan a ni tih a sawi a. He dan hmang hian halpuah leh halmawi khapna chu mumal leh awmze nei zawka kalpui a nih theih nan State Level, Distirct Level leh Local Level-ah Committee din tur a ni a, an mawhphurhna mumal taka duan a ni a, dan kenkawh kawnga mipuite chanvo pawh tarlan a ni a. Halpuah leh halmawi hman, kawl leh zawrh khuahkhirhna chu dan mumal taka siam a ni a, he dan zawm lote laka thubuai siam dan tur leh hremna dan mumal tak siam a nih thu a sawi a ni.
Nimin-a Bill sawihonaah hian Member 9-in thu an sawi a, siam that ngai ni a ngaihte siam that a nih hnuah 'The Mizoram Regulation of Fireworks Bill, 2026' chu lungrual takin House chuan a pass a ni.