FCRA chungchang ah Joint Memorandum thehluh a ni ta

Chief Minister Lalduhoma hovin niminpiah khan Union Home Minister hnenah Foreign Contribution (Regulation) Amendment Bill, 2026 leh Foreign Contribution (Regulation) Amendment Rules, 2026 chungchangah Joint Memorandum thehluh a ni.
Chief Minister Lalduhoma hovin Mizo Kohhran Hruaitu Committee (MKHC) aiawh Rev. Lallawmthanga, Secretary leh Council of Churches in Mizoram (CCM) aiawh Rev. Lalhmangaiha, General Secretary-te chuan niminpiah khan Union Home Minister Amit Shah chu Parliament House, New Delhi-ah hmuin Foreign Contribution (Regulation) Amendment Bill, 2026 leh Foreign Contribution (Regulation) Amendment Rules, 2026 chungchangah Joint Memorandum an thehlut a, Joint Memorandum-ah hian FCRA Amendment Bill, 2026 leh a hnuaia dan hrang hrangte chu tuna duan anih ang hi chuan pawm harsa an tih thu thlenin, siamthat a, ennawn emaw a tul thu an tarlang a. An rawtna thlen zinga pakhat, “He Dan hi tunhma lam huap (retrospective)-a hman loh ni se” tih chu Union Home Minister hian an ngenna ang hian retrospective a tih a ni lovang tih a lo tiam a. He Dan awmsa leh siam that rawt tharna te chu ziakin pek a lo tiam bawk a. Memorundum-a an thu thlente chu a mal malin a chhanna ziaka pek a lo remti bawk a ni.

Heng bakah hian Airports Authority of India (AAI) hnena Lengpui Airport hlan thuai tura Chief Minister in a ngenna chu rang taka bawhzui a nih tur thu Union Home Minister hian hrilhin, Chief Minister chuan Cooperation Department hmalakna hrang hrangte a hmun ngeia hmuh pui turin a sawm a, Union Home Minister chuan hun remchang hmasaah Mizoram lo kal a tum thu a sawi bawk a ni.