Eptu party pahnih ten Chief Minister chu Hnam tana thil pawi sawi ah an puh

Mizoram-a eptu Party pahnih, MNF leh Congress Party chuan Chief Minister Lalduhoma chu hnam tana thil pawi sawi ah puhin, MNF party chuan Chief Minister chu mipui hnenah ngaihdam dil ngei tur leh a thusawite tun thla ni 15 hmaa sût leh turin an phût thu an sawi.

MNF thuneitu sang National Core Committee (NCC), Political Affairs Committee (PAC) leh MNF MLA-te chu nimin khan Aizawl-a an Party Office, Mizo Hnam Run-ah thukhawmin July 31, 2026-a Law College zirlaite hmaa Chief Minister Lalduhoma'n remna thuthlung leh Inner Line Permit chungchang a thusawi chu thudik lo a nih thu leh ngaihdam dil tura an phût thu an sawi a. MNF hruaitute thukhawm chuan Chief Minister Lalduhoma chu thudik lo tak, ram leh hnam leh sakhaw tana him lo, hnam pawikhawihna leh hnam himna tiderthawng zawnga thu a sawi avangin mipui hnenah ngaihdam dil ngei tur leh a thusawi chu tun thla ni 15 hmaa sût ngei tura an phut thu an sawi a; Chief Minister thusawi hi pawi an tiin an lak thutak thu leh lungchhiat thlak an tih thu sawiin, a tul anga hmalak chhunzawm zel relin Total Bandh neih thlengin ruahmanna an siam a; hemi chungchangah hian MNF President Zoramthanga chuan tunkar Ningani khian thuthar lakhawmtute a kawm dawn bawk a ni.

Mizoram Pradesh Youth Congress Committee (MPYCC) chu Chief Minister thusawi chungchang lungawilohna lantir nan nimin khan Aizawl Vanapa Hall kawtah an pungkhawm a, Chief Minister chu remna leh muanna sawi nep a, mahni insawi pawimawh tumah puhin, 'Mizoram in ILP a neih chu sawrkar laipuiin a duh chuan a paih thei' tih leh 'ILP chu dimte a hman tur' a nih thu a sawi chu 'Dawih aw' chhuahna ah an ngaih thu leh pawi an tih thu an tarlang a ni.

MPYCC President Ngurdingpuia Pachuau kaihhruai he hunah hian MPCC General Secretary Rosiamngheta chuan Chief Minister hruaina hnuaiah Mizoram leh a chhunga cheng hnam hrang hrang leh Sakhua chu dinhmun hlauhawm takah an dintir mek nia sawiin, “Mizoram him lohna atan hian mawh a phur a, a thusawi avang hian Mizoram mipui rilru thuk takin a hliam a, tunkar chhung ngei hian mipui hnenah a thusawi avanga ngaihdam dil turin Congress Thalai chuan an phut a ni,” a ti.