Casual Teacher-te hlawh tisang tura ngenin HSLC leh HSSLC-ah Top 10 tarlang turin ngen
NSUI Mizoram State hian Mizoram zirna ti hmasawn turin Education Minister Dr. Vanlalthlana hnenah hian rawtna an thlen a. Heng zingah hian Mizoram sawrkar hnuaia thawk mek Casual Teacher 1475-te hlawh tisang tura ngenin, “High School leh Middle School-a thawk Casual Teacher Graduate chin, mi 701-te hian ni khatah Rs. 730/- an hlawh mek a, Primary School a thawk Casual Teacher 675-te hian ni khatah Rs. 570/- an hlawh bawk. Mistiri hlawh Rs. 1000/- leh a chunglam leh labour hlawh zat Rs. 600/- pawh an hlawh pha lo hi a tha lo kan ti a, thalaite, a bikin lehkhathiam zawkte rah behna leh hmusitna, zirtirtu hna zahawmna tihbawrhbanna ah NSUI chuan kan ngai a. Chuvangin, a rang thei ang bera School Education hnuaia a nghet lo a thawk, Casual Teacher te hlawh hi tihpun nise kan duh a ni,” an ti.
Hei bakah hian Sawrkar School a Zirtirtute chi hrang hrang, hlawh inang lo nuai awm reng mai chu thil fel lo tak a nih thu sawiin, “Mission/Programme hrang hrang (Samagra, Provisional, Casual teacher, etc) hnuaia thawk pawh ni se, Mizoram-ah chuan zirtirtu hlawh hi inang tlanga siam dan kawng zawn nise kan duh hle,” tiin Education Minister chu hma lak sak turin an ngen a ni.
NSUI Mizoram State chuan HSLC leh HSSLC Result tihchhuah dan tharah result quality (Division hrang hranga pass zat/dan mipui hriat theih loh tura thup a ni ta tlat chu pawi an tih thu sawiin, “Hei hian Zirna ah hmasawnna aiin tlakhniamna a thlen ang tih kan hlau hle a ni,” tiin HSLC leh HSSLC result-ah hian mipuiin result quality awlsam taka an hriat theih nan Division hrang hranga pass zat mai bakah data pawimawhte chiang taka tarlang leh turin an ngen a. ‘Top 10 tarlan ah School-te inelna tha lo a siam’ tih avanga Top 10 pawh tarlang duh tawh lo an nih laia Education Minister ber Top 10 chinte chawimawinaa Khuallian-a a tang leh si chu hriatthiam har an tih thu pawh sawiin, “Zirna siamthatna tur thilah chuan sawrkar thawhpui kan inpeih reng a. Chutih rualin, zirna leh zirlaite tana tha lo thil reng reng chu dodal kan inpeih reng bawk a ni,” an ti bawk.