Electric Smart Meter duh loh lantirin pungkhawm
Lungawilohna lantirna kaihruaitu RTI & Social Activist Zairemthanga chuan Smart Meter chu Aizawl-ah pawh la vuah kim loh a ni chung pawhin sawiselna a tam nghal hle a, Meter Bill hmasa aiin a let 4/5 ten a sang a, a let 10-a sang te pawh an awm niin a sawi a, thingtlang lama vuah a nih hma hian Meter hi ennawn ni ngei se an duh thu a sawi a. He lungawi lohna lantirtute hi pawl an nih loh thu a sawi bawk.
Electric bill sang complaint chuan awmzia a awm lo hle niin a sawi bawk a, Bill kal dan pawh a mumal lo hle tih sawiin, State tam takin Smart Meter hi an dodal mek a, Court-a inkhing te pawh an awm niin a sawi a, State thenkhat ah chuan mandatory in an kalpui ve lo niin a sawi bawk a, Mizoram sawrkar pawh hian a duh chuan hetiang hian a kalpui ve theih lohna tur a awm lo a ti.
He huna tel te hian Resolution paruk (6) pass in Smart meter vuah a nih hnua Electric Bill sang nasa lutuk chu Sawrkar in enfiah se an duh thu te; Bill pun dan dik lo emaw felhlel deuh emaw hmuhchhuah a awm a, chutiang ang bill pung dik lo Sawrkarin a dawng a nih chuan mipui hnenah pek kir leh an duh thu te; Complain a awmin rang takin P&E Department-in enfiah thin se an duh thu te; Smart Meter vuah tawh sa leh la vuah lohte pawh Department-in uluk takin endik vek sela, endik a nih hma chuan vuah chhunzawm ni tawh lo se an duh thu te; Billing period tih danglam dawnah emaw, Sawrkar in thil thar mipui sum bawm khawih che thei chi a chhawpchhuah dawn reng rengin zirtirna pek hmasak an duh thu te an tarlang a ni.