Drug Treatment Centre 21 hnenah Accreditation Certificate leh GIA hlanin CM Special Package sem a ni
Social Welfare, Women & Child Development (SW,WCD) Department bultuma Aizawl Assembly Annex-a MLA Conference Hall-a hun hman ah Chief Minister Lalduhoma chuan thalai tam tak ruihhlo sal-a an tan mek avangin chhungkua leh khawtlang a nghawng nasa a, nun kawng pangngaia an kir leh theihna turin kawng hrang hrangin hmalak a nih thu leh Kohhran, Tlawmngai Pawl leh Rinna behchhana Rehabilitation Centre/Home hrang hrangte an thawkrim hle bawk tih a sawi a. Ruihhlo zawrh leh thehdarh dona kawngah nasa taka hmalak a nih thu pawh sawiin, “Mizoram-a Security Agency zawng zawngte nen kan tangho a, Operation te kan kalpui a. Ruihhlo kan man nasat avangin a vang tial tial a, a man pawh a to sawt hle a ni. Ruihhlo dona kawngah hian kan tlawmngai Pawlte an tangkai em em a ni,” a ti.
Chief Minister chuan he hun an hman chhan ber chu humsual dai leh ruihhlo ngaite chawm-dawlna hna thawktu Center-te an inenkawlna tur pek leh thawk chhunzawm zel thei turte thlanchhuah a nih thu sawiin, “Heng hna hi rawngbawlna anga ngaia thawh chi a nih avangin mi zawng zawng thawh theih pawh niin a lang lova. Kohhran leh Pathian kohna dawng ten tha takin an kalpui hlawm a. Anni nen hian sawrkar chuan thawhho tha kan ti a, ruahmanna pawh kan siam a ni,” a ti a. Ruihhlo bansan-a nunphung pangngaia kir mi engemaw zat hnenah CM Special Package hi pek a nih thu sawiin, “Hei hi thil chhinchhiah tlak tak niin ka hria. A dawngtute hmel ka han en a, Hulhliap a in awm lai nena khaikhin chuan in hmel hmuh a nuam ta hle mai. In taksain nasa takin hma a sawn tih a lang a ni,” tiin tunah hian bul an tanna tur sum leh pai an pek chu a beitham tih a sawi a, “Nimahsela, tha taka hmanga eizawnna lama hmasawnpui lo tum tlat ula kan duh khawp mai,” a ti bawk.
SW, WCD Commissioner & Secretary Lalzarmawii kaihhruai he hunah hian khual zahawm Social Welfare Minister Lalrinpuii chuan Mizoram sawrkar hnuaiah ruihhlo ngai, nun kawng dik zawha hawikirte hmakhua a en thu sawiin, an banah sawrkarin kaih a inhuam tih a sawi a. Progress partner mi 33-te chu Chief Minister ngeiin Financial Assistance hi hlan se an duh chhan sawiin, “Chief Minister hian an bana kaih ngaite chu kan kai ang tiin a sawi thin a, ruihhlo ngai dam leh te hi an bana kaih ngaite chu an ni a. A takin Vawiin-ah amah ngeiin a kai ta a ni,” tiin an thil dawn te chu an dawn chhan ang taka hmang tur leh midangte tan malsawmna ni turin a chah bawk.
Inrinni-a he hun hman ah hian Progress Partner-te hnenah CM Special Package leh Accredited Drug Treatment Centre-te hnena Accreditation Certificate leh Grant-in-Aid (GIA) hlan bakah hian Mitdel ni chunga tunhnaia PhD hmu thar Dr. Lalbuatsaiha chawimawina hlan a ni bawk.