CM Special Package-ah mi 5368 thlang tawhin Loan Component-ah mi 742 thlan an ni tawh bawk
Planning & Programme Implementation Conference Hall-a Mizoram State Policy Coordination Committee thutkhawm ah hian Handholding Scheme CEO, Lalfakzuala chuan an hmalakna tarlangin, CM Special Package Phase-I ah Progress Partner 2,255 neiin cheng vbc. 18.33 sen a ni a, Phase-II ah Progress Partner 3,113 thlang tawhin cheng vbc. 4.25 senna tur a ni a, sum hi la pekchhuah vek lovin dilna la endik fel loh 2,135 awmin Phase-III kalpui mai tawh tur a nih avangin heng la endik loh (pending) te hi a rang lama umzui nise an ti a, sum la pek kim loh te pawh a rang lama pek nise an ti bawk. Loan Component-ah a vaiin Progress Partner 742 thlan tawh niin an zingah hian Loan hmu tawh 482 an awm a, an Loan hmuh zat belhkhawm hi cheng vbc. 44.05 a tling tawh a. MRB chuan Loan pe hnem berin Partner 314 hnenah cheng vbc. 23.98 an pe a, a dawttu SBI in mi 104 hnenah cheng vbc. 9.48 pein MCAB in mi 59 hnenah cheng vbc. 10.20 an pe bawk.
An loan punna rulhsakna (Interest Subvention) chu Progress Partner 479 te tan tum hnih kalpui tawh niin a tum khatnaah Rs. 15,92,137 pe in a tum hnihna ah Rs. 96,21,210 pek a ni a. Guarantee Fee pawh Rs. 14,01,762 pekchhuah a ni tawh a, Loan huangah hian dilna lut tawh la endik fel loh hi 233 a awm mek a. Handholding Scheme leh NABARD thawkdun (convergence) in Serchhip District-a khaw pasarih ah Progress Partners 500 te huam tur cheng nuai 625.45 project kalpui mek a ni bawk.
Handholding Phase-III kalpui leh turah kalphung thenkhat siamrem ngai nia lang sawiho niin inkaihhruaina tihdanglam deuh a awm dawn a. Zau zawka Bana Kaih Media & Publicity kalpui dan tur leh Postal Department atanga rawtna lut te an sawiho bawk.