YMA in CM hnenah an thlen
Sub-Hqrs. YMA Serchhip hruaitute hian Chief Minister hnenah hian Serchhip District Hospital sak mek chungchanga NGOCC ten Guwahati-a PGCIL an dawr dan thlenin, chak zawka hmalak anih theih nana an ngenna chu CM chuan sum chung-chang ah PGCIL lam pawhin an tihfel tawh thu leh Health Department-ah sum a awm tawh thu leh a fel tep tawh an beisei thu a lo sawi a. Serchhip khawchhung-a lei che thin chungchang an thlen pawh Geology and Mining lam be nghalin Chanmari Veng, Darnam Veng, Bazar Hnuai, Dinthar Veng leh Field Veng-a lei che thin te chu zirchiang turin thurawn a pe a ni.
Serchhip Auditorium chungchang an thlen ah Chief Minister chuan Building Dismantling Rules-ah harsatna tlem a awm thu lo sawiin, lehkha kal mek chu July 7, 2026 zan-ah a approved tawh thu leh UD&PA lamin a thiah hna hi PWD an pek thuai a beisei thu a sawi a. District Court-a Session Judge nghet dah chungchanga File kal mek chu chhhuitirin DP&AR-ah a la awm thu hriat a ni a, Chief Minister hian DP&AR hotute be nghalin approved thuai turin a hriattir a ni.
Serchhip District-a Police indaihlohna an thlen ah DGP be nghalin Serchhip DEF atanga Police an sawnchhuah tak chu a aiawh dah turin a hriattir bakah Police indaihlohna chungchangah Staff awmdan kimchang tak DC te kaltlanga thehlut tura a tih tur thu leh a lo enzui tur thu a sawi a. Excise & Narcotic Department tana Motor (Bolero Camper) dilna chu tihhlawhtlin anih tur thu a lo hrilh a. Bawlhhlawh paihna hmun Bazar a mi leh Bawlhhlawh paihna a harsatna an thlen te pawh UD&PA-ah a lo thlen tur thu leh Bawlhhlawh paihna motor pakhat pek belh a tum thu a lo sawi a, heng bakah hian an hmalakna kal mek hrang hrangte pawh Chief Minister hnenah hian an thlen a ni.