Union Education Minister thar tur ruat nghal

Union Education Minister Dharmendra Pradhan chuan Inrinni khan banna thehlutin Union Minister nilai Pralhad Joshi chu Education lo chang zui tura tih a ni.

Hun engemaw chen ramchhunga zirlaite leh thalai ten bang tura an nawr hnuah Uion Education Minister Dharmendra Pradhan hian Inrinni khan Prime Minister Narendra Modi-a hnenah banna a thehlut ta a, Social media lamah Dharmendra Pradhan chuan ni 10 kalta chhunga zirlaite lungawilohna lantir avanga thil thleng chu pawi a tih thu a sawi a. New Delhi-a Jantar Mantar-a lungawihlohna lantirna leh ramchhung hmun danga thil awmdante a thlirin Prime Minister Narendra Modia hnenah banna a thehlut tih a sawi a. Tuna thil thleng mek hi ram tana pawikhawih tumtuten remchangah an lak an hlauh avang leh thalaite hma hunah harsatna a awm loh nan a bang tih a sawi a ni.

NEET-UG 2026-a thil diklo chungchang sawi-langin Pradhan-a chuan, thil diklo chhui turin sawrkar chuan CBI kutah thuneihna a hlan thu leh Exam pawh cancel vek anih thu a sawi a, Exam tha leh tura ruahmanna siam a nih thu leh kumthar atang chuan Computer Based Test (CBT) an kalpui tawh dawn tih a sawi bawk a. Buaina a thlen tirh atangin mawhphurhna chu a lak nghal thu sawiin, vawi khatmah a tlanchhiat loh thu leh July ni 16-a NEET-UG result tihchhuah pawh a lungawithlak a tih thu a sawi bawk.

Hetianga banna a thehluh avang hian Union Minister Pralhad Joshi chu Education Minister atan ruat zui a ni a, Amah hi Consumer Affairs, Food and Public Distribution leh New and Renewable Energy Minister a ni mek a, President Droupadi Murmu chuan Union Council of Ministers atanga Dharmendra Pradhan a banna thehluh chu a pawm tawh bawk a ni.

Education Minister Dharmendra Pradhan a ban hnu hian sawrkar aiawh Union Minister JP Nadda leh Dr. Jitendra Singh te chuan lungawilohna lantirtu Cockcroach Janta Party hruaitute chu a vawi thum nan be lehin Exam dan kalphung siamthat leh paper putru thin venna tura an phutte an sawiho a. An inbiak zawh hnu hian CJP thupuangtu Ashutosh Ranka chuan an thilphutte sawrkarin a tihhlawhtlinsak vek dawn tih sawiin, lungawi loh an lantir pawh an titawp nghal dawn tih a sawi a ni.