Kum chanve chhungin piang 10,643 leh thi 4156 awm
Mizoram sawrkar-a Directorate of Economics & Statistics-in a tarlan danin, kumin kum chanve chhunga Mizoram-a naupiang 10,643 zinga 5,269 te chu mipa niin midang 5,374 te chu hmeichhia an ni a, hemi chhung veka mitthi 4,156 zinga 2,647 chu mipa niin midang 1,509 chu hmeichhia an ni bawk a. Nau piang zawng zawng atanga chhuta za zela 49.50 te Mipa an nih laiin mitthi zawng zawng atanga chhutin za zela 63.69 chu mipa an ni thung a. Kum chanve chhung hian Mizoram-ah mitthi aiin piang hi 6,487 in an tam zawk a ni.
Kumin thla 6 chhungin January thla kha nau piang tam ber thla niin, naupiang 1,845 an awm a. June thla kha mitthi tam ber tum niin mi 843 an thi a ni. Aizawl District chu kumin thla 6 chhunga naupiang leh mitthi tam berna District niin naupiang 4,564 leh mitthi 2,114 an awm a. Khawzawl District chu naupiang tlemna ber niin kumin thla 6 chhung hian naupiang 67 an awm a. Hnahthial District chu mitthi tlemna ber niin kumin kum chanve chhungin mi 82 an thi a ni.