Ropuiliani Company Ltd. ten Award an dawng
Tunkar Ningani khan Indian Chamber of Commerce chuan New Delhi-a Le Meridien Hotel-ah ‘Krishi Vikram Awards, 2026’ semin he hunah hian Ropuiliani Women Farmer Producer Company Ltd. hian ‘Women-Based
FPO Excellence Award’ hi an dawng a, Company aiawhin CEO, Henry Saingura leh Board of Directors Member Lalremtluangi, Thanghnuni leh Laltlankimi ten he chawimawina hi an dawng a ni.
Ropuiliani Women Farmer Producer Company Ltd. hi Mizoram State Rural Livelihoods Mission (MzSRLM) hnuaia din a ni a, Women-Based FPO Excellence Award hi khawtlang hmasawnna, sumdawnna tha, company enkawl dan, thlai thar hlutna belhchhah, a hralhna tha zawk buaipui leh hmeichhe nunphung tihhmasawnna lam hna an thawh that avanga hlan an ni.
Ropuiliani Women Farmer Company Ltd hi kum 2020 khan din a ni a. COVID hripui leng vangin harsatna an tawh hnuah kum 2023 atang khan chak zawkin hma an la chho a. Mizoram District 7-a Rural Development Block 16, khua 154 tuamchhuakin Member 5335 an nei tawh a. Ropuil-iani Producer Company-a Share Holder te tharchhuah Sawhthing, Mizo Hmarcha leh Aieng te man man zawka lei sakin, a hlutna tipung tura sawngbawl a nih hnuah an hralhchhuah leh thin a ni a. Kumin ah pawh theihtawp chhuaha lei sak lehin chutianga kuthnathawktute thlai lei sak tur chuan Ropuiliani Company-ah hian inziahluh a ngai thung a. He Company a inziaklutte chu SHG member an ni tur a ni a, anni hian Rs. 150 (share) pe in Company neitu nihna an nei thei a ni. Ropuiliani Women Farmer Producer Company Ltd. hi Chhingchhip-a MIFCO hmun ah inbunin Sawhthing, Hmarcha leh Aieng sawngbawlna, Primary Processing Plant an bun tawh a ni.