Thingtlang H/S-ah Internet tha pek nan MoU ziah a ni

School Education Department leh Bharat Sanchar Nigam Limited (BSNL) te chuan Mizoram thingtlang (Rural area)-a High School-te High-Speed Internet pekna tur Memorandum of Understanding (MoU) chu nimin khan School Education Minister Dr. Vanlalthlana kaihhruaina in an ziak a, School Education Department aiawhin Commissioner & Secretary K. Lalthawmmawia, Additional Secretary Zothantluangi leh State Project Director C. Lalthanzira ten hming ziakin BSNL aiawhin BP Meena, General Manager leh Deputy General Manager Biakthianghlima Chenkual-ten hming an ziak a, an MoU hi kum 5 (nga) chhung atan ziah a ni. He MoU-in a tum ber chu Sawrkar Laipui ruahmanna, Amended Bharatnet Program (ABP) hnuaia Digital Bharat Nidhi (DBN) Incentive Scheme kaltlanga thingtlang High School-te Fibre-Technology-To-Home (FTTH) hmanga internet chak zawk pek a ni.

Nimin-a MoU ziahna hunah hian School Education Minister Dr. Vanlalthlana chuan School Education Department-in he MoU an sign chhan sawiin, Khawpui leh thingtlang kilkhawra zirlaiten khawvel thiamna inang tlang an dawn theih nan internet leh technology avanga zirna-a inthlauhna (digital divide) awm mek tihbo nan he hmalakna hi a pawimawh hle tih a sawi a. Tunlai khawvelah zirna kaihhnawiha inrelbawlna kalpui nan Internet a pawimawh tawh hle tih sawiin, Real-Time data monitoring (UDISE+ leh online portal dangte) hlawhtling taka thehluh a nih theih nan leh Zirtirtute thiamna tihhmasawn nan School-ten internet rintlak an mamawh takzet tih a sawi bawk.

School Education Department leh BSNL hotute chuan Mizoram thingtlang School-te thuamchak a, zirlaite leh zirtirtuten tunlai thiamna hmanga digital khawvel nen inthlunzawmna tha zawk an neih theih ngei an beisei a ni.