Mizoram-ah HIV vei mi 34,576 hmuhchhuah an ni tawh
Mizoram State AIDS Control Society (MSACS) tarlan danin, Mizoram-a HIV inkaichhawn tamna ber chu mipat hmeichhiatna hman atangin a ni a, HIV vei hmuhchhuah zawng zawng 34,576 atangin zaa 75 zet a ni a. Inchiuna hmanrua (needle/syringe) inhmantawm atanga kai zaa 22 an awm bawk a ni. Mizoram-ah hian a thlawna HIV vei leh vei loh enfiahna hmun, Integrated Counselling & Testing Centre (ICTC) 39 a awm a, HIV veite enkawlna ART Centre 14 awm bawkin District tinah ICTC leh ART Centre a awm a. HIV Estimation 2023-in a tarlan danin Mizoram Adult HIV Prevalence chu zaa 2.73 a ni a, National Adult HIV Prevalence chu zaa 0.2 a ni.
HIV vei hmuhchhuah zingah kum 25-34 inkar an tam ber a, hri kai hmuhchhuah zinga mi 13,142 an tling a, chu chu zaa 41.49 a tling bawk a. Kum 35-49 inkarin dawtin mi 8,980 an tling a, zaa 27.99 an tling bawk. Heng bakah hian kum 15-24 inkar mi 6,839 tling bawkin chu chu zaa 21.56 a ni a. Kum 50 chung lam mi 2,034 tlingin zaa 6.24 an tling a, kum 14 hnuailam mi 850 awm bawkin za a 2.67 an tling bawk.
MSACS thawktute chuan, “Tunhma chuan HIV natna hi mi awm tha duh lo leh ruihhlo ngaite chauh kai theih tura kan ngaih laiin tunah chuan kan rin loh pui puiten an kai tawh a, kan fimkhur tlan a pawimawh takzet,” an ti bawk.