Serchhip-ah Catholic Puithiam dahnghehna nei
Serchhip-a Roman Catholic Parish Priest dahnghehna Inkhawm hi Serchhip P&E Veng-a Our Lady of Assumption Biak In-ah neih niin Aizawl Diocese Bishop aiawhin Rev. Fr. Joseph Lalbiakthanga Vicar General ni bawk chuan a dah nghet a, he hunah hian Kohhran mipuite nen Mass Thianghlim hmangin hun hmanho a ni bawk. Rev. Fr. John Zoduhsanga hian Fr. Praveen Fernandes thlakin kum nga chhung Serchhip hi a enkawl dawn a, amah hi Puithiam tang tur inzirna hmun, Minor Seminary, Kolasib-a Rector hna chelh thin niin Serchhip-a Roman Catholic Kohhran Bialtu Puithiam (Parish Priest) Fr. John-a hian Serchhip Parish a enkawl dawn bakah Kohhran School- Marian High School Serchhip, All Saints School New Serchhip leh St. Teresa School Chhiahtlang-ah te Principal hna a chelh nghal ang.
Nimin-a Parish Priest lakluhna hun neih zawh hnu hian Parish Pastoral Council Serchhip kaihhruaina in Kohhran hnuaia pawl hrang hrang leh Kohhran hruaitute nen inhmelhriatna leh thingpui inhona an nei nghal bawk.