Synod in Home tanpuina atan nuai 80 pek a tum
.jfif)
Kum 2024 Synod Inkhawmpui-ah, “Ruihhlo ngaite enkawlna Home hrang hrangte hi Synod hian tun aia nasain tanpui ni rawh se” tih thu Tuirini Presbytery atanga lut chu SEC-in lo bawhzui zel rawh se tiin rel a ni a. SEC chuan, “Home hrang hrang nasa zawka tanpui dan tur lo zirchiangin Social Front-in rawtna nen SEC-ah thlen leh mi se kan ti,” tiin a rel a. Social Front Committee-in Social Front Executive Committee bawhzui turin a dah a, Social Front Executive Committee chuan lo zir chiang a, ruahmanna te siam turin mi pathum a ruat a. An ruahmanna chu Synod Social Front Executive Committee-in a thlir leh hnuah SEC-ah thlen leh a ni ta a ni.
Synod zirchianna atanga a lan danin tun dinhmunah Mizoram chhungah Rehabilitation/De-Addiction Home 44 an awm mek a, an zinga 12 hian Ministry of Social Justice & Empowerment atangin tanpuina an dawng a. Home zinga 8 hi Kohhran enkawl lai a niin eizawnna atana din 2, Pawlho enkawl 17 leh chin hriat loh 5 an awm mek a ni. Synod chuan Mizoram chhunga mimal leh pawlho din De-Addiction Centre/Rehabilitation Centre ding tawh phawt chu sumdawnna lam hawi a nih loh chuan tanpuina hi pek vek nise a ti a. Tanpuina hi tum hnih semah hman nise, an dinhmunte zirchiangin pek nawn tlak lo te pawh a awm theih avangin tanpuina hi tum khatah pek vek ni lo se a ti bawk.
Synod in ruahmanna a siam dan chuan TNT enkawl Kalvari Hospital, Zuangtui hnenah nuai 10, Blessing Home Sakawrtuichhun-ah nuai 1, TNT Kolasib-ah nuai 5, TNT Lunglei-ah nuai 7, TNT Champhai-ah nuai 5, Tawngtai Bethel Camping Centre, Sakawrtuichhun-ah nuai 7, OKM Phunchawng leh Golgotha Camping Centre Vairengte hnenah nuai 5 ve ve te chu an pek tam zual langsar an ni a. Heng bakah hian Home hrang hrang te chu mihring an enkawl tam dan a zirin Rs. 50,000, Rs. 1,00,000, Rs. 2,00,000 leh a dangte an ruahman bawk.
Synod chuan Ministry of Social Justice and Empowerment atanga tanpuina dawng mek Centre 14 te tanpui nana senso tur atan Rs. 28,00,000; mi 50 aia tlem awm mekna Centre 17 tanpui nana senso atan Rs. 17,00,000; mi 51 chunglam, mi 100 aia tlem si awm mekna Centre 4 tanpui nana senso atan Rs. 8,00,000; mi 301 chunglam, mi 500 aia tlem si awm mekna Centre 2 tanpui nana senso atan Rs. 10,00,000; mi 501 chunglam, mi 1000 aia tlem si awm mekna Centre pakhat tanpui nana senso atan Rs. 7,00,000 leh mi 1001 chunglam tanpui nana senso atan Rs. 10,00,000 a pawm a. Tanpuina sum senso tur zawng zawng belhkhawm hi a vaiin Rs. 80,00,000/- a ni.