Union Minister of State for MoRTH hnenah Kawng leh Lei atana dilna ti hlawhtling turin ngen

Lok Sabha MP Richard Vanlalhmangaiha leh MLA pahnih- Lt. Col. Clement Lalhmingthanga leh T. Lalhlimpuia te chuan Union Minister of State for Road Transport and Highways (MoRTH), Ajay Tamta hnenah Mizoram PWD-in National Highway leh Lei pawimawh tak tak dawh leh thawmthat an dilna chu a rang thei ang bera tihlawhtling turin an ngen.

Lok Sabha MP leh MLA pahnih te hian Zirtawpni khan Union Minister of State hi New Delhi-a a chenna In-ah hmuin Lok Sabha MP Richard Vanlalhmangaiha chuan Mizoram PWD-in National Highway-306A, kilometre 45 atanga kilometre 102 inkar thawmthatna tura cheng vbc. 99.78 a dil chu pechhuak thuai turin Union Minister hi a ngen a. Hei bakah hian NH-108 Langkai lui-a Lei (permanent bridge) dawh leh Teirei Lui-a Lei an hman mek Bailey Bridge hlui tawh tak thlakna tur Lei nghet leh rintlak tak dawh dilna pawh tikhawtlai lova pawmsak thuai turin a ngen bawk a. Heng Lei pahnih dawhna tura Detailed Project Report (DPR) chu thla hmasa ni 9 khan thehluh a ni tawh tih sawiin, heng Lei pahnihte hi Mizoram leh State thenawm Tripura inkalpawhna atan a pawimawh hle tih a sawi a ni.

Lunglei West Bialtu MLA T. Lalhlimpuia chuan Lunglei Western By-pass Road Project, kilometre 28 chuang a thui siamna tur cheng vbc. 213.60 pawmsak turin Minister a ngen a, he by-pass road hi siam zawh a nih chuan Lawngtlai District bakah Kaladan Multi-Modal Transit Transport Project, Siaha District, Chakma Autonomous District Council Headquarters leh Tlabung Border Trade Centre kalpawhna turah hmasawnna nasa tak a thlen dawn bakah lirthei tawt lutuk thin pawh a tiziaawm dawn a, NHIDCL-in MoRTH hnena Lunglei Western By-pass DPR a thehluh tawh chu pawmsak thuai turin a ngen a. Hei bakah hian NHIDCL-in Hrangchalkawn atanga Lunglei inkar NH-302 kawng an laih zaua leimin avanga Theiriat khuaa chengte’n harsatna hrang hrang an tawh te chu thlenin, Theiriat khaw kawng lailawk siamna tur Rs. 110,49,000 rawtna a thlen bawk a, Union Minister Ajay Tamta chuan an thil ngen te hi tihhlawtlin a nih ngei theih nan hma a lo lak tur thu a lo hrilh a ni.