State Level Mega Oil Palm Plantation Drive neih a ni

Mizoram sawrkar Agriculture & Farmers' Welfare Department buatsaihin nimin khan Kolasib-ah 'State Level Mega Oil Palm Plantation Drive 2026' neih a ni a, he hun hi Agriculture Minister PC. Vanlalruata chuan hmanpuiin Oil Palm chin theihna hmun zawng zawngah ching vek pawh ni ila Mizoram leilung za zela pathum (3%) vel chauh a la ni dawn tih sawiin, ‘National Mission on Edible Oils - Oil Palm (NMEO-OP) hnuaia central sawrkarin Oil Palm hmun nei tura min beiseina chu kan la pha lo hle a ni,” a ti a. India ram chu hriak (edible oil) lamah intodelh a tum avangin central sawrkarin duhsak takin mipuite hmasawn nan min kaihhruai thu leh Kolasib leh Mamit District-a Oil Palm chin theihna hmun zawng zawngah chin khah vek a nih theih nan tanlak a tul thu leh Lunglei, Lawngtlai leh Siaha District-ah te pawh hmalakna kalpui chhoh mek a nih thu a sawi bawk. He huna tarlan a nih danin Mizoram-ah ram hectare 7,260 a zauvah Oil Palm chin niin kum khat chhungin metric tonne 7,500 atanga 8,000 inkar tharchhuah thin a ni.