Serchhip District-a raltlan awm te hnenah tun thla ni 10 atangin buhfai sem tura ruahman a ni
Serchhip District Bawrhsap Paul L. Khuma chuan Serchhip District chhunga raltlan te hnena buhfai sem tur chungchang ah hian tun thla ni 3 khan lehkha tichhuakin Serchhip District-a raltlan te tana sem tur Buhfai rawn thleng hi Sub-Hqrs. YMA hnuaia Branch hrang hrang ten a semchhuah turin Sub-Hqrs. YMA kut-ah a awm tur thu a tarlang a, July 10, 2026-ah Serchhip Kudam atanga phurhchhuah tur niin Branch YMA ten raltlan list-a lang te hnenah mi pakhat tan kg. 35 zelin an semchhuak dawn a. Sub-Hqrs. YMA Serchhip in a huam loh Baktawng leh Chhuanthar Tlangnuam huamchhunga raltlan te hnena buhfai sem tur chu Baktawng Branch YMA leh Chhuanthar Tlangnuam Branch YMA te kutah awm dawn a, raltlan te hnena buhfai semchhuah hi July 24, 2026-ah chuan tihfel vek tura ruahman a ni bawk.
Sawrkar in ruahmanna a siam dan chuan raltlan te hnena buhfai semchhuah a nih hunah an pekchhuah te hnen atangin pek an ni ngei tih lanna Receipt/APR lak zel tur niin Buhfai semchhuah turte chu Serchhip-a Supply Kudam atanga pekchhuah a nih hmain khaw tina pek tur ruahman angin DCSO leh a Staff ten khua leh veng tin tana chhinchhiahna fel tak siamin an buk chhuak vek anga. Supply Kudam atanga raltlan te tana khaw hrang hranga buhfai phurhchhuah zat leh a bang la awm zat te chu DCSO leh a thawhpui ten Stock Register siamin an chhinchhiah dawn bawk a ni.
Sawrkar laipui ruahman anga raltlan te hnena Buhfai semchhuah tur atan hian Serchhip DC Office-a raltlan list awmsa chu tunhnai khan Serchhip Sub-Hqrs. YMA huamchhunga Branch hrang hrangte hnenah pekchhuah niin raltlan awm mek te nen enfiahna neih leh a ni a, hemi hnua YMA Branch hrang hrang ten Serchhip DC Office-a report an thehluh atanga a lan danin tun dinhmunah Serchhip District-ah raltlan mi 908 an awm anga chhinchhiah niin heng mite hnenah hian buhfai hi mi pakhat tan kg. 35 zela semchhuah a ni ang. Serchhip District-ah hian tun dinhmunah YMA Branch 31-ah raltlan hi an awm mek a, heng zinga mi 648 te chu Myanmar atanga raltlan niin Bangladesh atanga raltlan mi 239 leh Manipur atanga raltlan mi 21 an awm a ni.
Serchhip District-ah hian YMA Branch 30-ah Myanmar atanga raltlan hi awmin a khua anga chhutin Sailulak-ah 4, Lungkawlh-ah 18, Leng-ah 22, N. Vanlaiphai-ah 39, Khawlailung-ah 7, Keitum-ah 11, Thenzawl-ah 107, Zote South-ah 4, Chhiahtlang-ah 8, Vanchengte-ah 5, Khawbel-ah 2, Mualpui Chhingchhip-ah 19, Baktawng-ah 62 leh Chhuanthar Tlangnuam-ah 58 bakah Ser-chhip-a Branch hrang hrang 11-ah mi 282 te an ni.
Myanmar atanga raltlan rawn lut Serchhip a la awm te hi Serchhip Kawnpui South-ah tam berin 67 an awm a, Serchhip Chhim Veng-ah 46, Serchhip Darnam Veng-ah 41, Serchhip Chanmari Veng-ah 26, Serchhip Hmar Veng-ah 24, Ser-chhip Dinthar Veng-ah 19, Serchhip Field Veng-ah 18, Serchhip P&E Veng-ah 16, Serchhip Kawnpui North-ah 15, New Serchhip Bazar-ah 7 leh IOC Veng-ah 3 te an ni.
Heng bakah hian Bangladesh atanga raltlan mi 239 te hi Thenzawl-a awm te vek niin an zinga mi 134 chu Thenzawl Farm Veng-ah awmin Thenzawl Field Veng-ah mi 67, Then-zawl Kanan-ah 24 leh Thenzawl Venghlun-ah 14 an ni.
Manipur atanga raltlan rawn lut mi 21 la awm mek te zinga 10 te hi Serchhip P&E Veng-a awm an ni a, N. Vanlaiphai Bangla Veng-ah 7 leh Thenzawl Venghlun-ah mi 4 an la awm bawk a ni.