Serchhip District chhunga raltlan awm mi 908 te hnenah buhfai semchhuah tan a ni
Serchhip District-a raltlan awm mek te hnena semchhuah tur buhfai hi nimin khan Serchhip DC Office tual atangin Serchhip Bawrhsap, Paul L. Khuma chuan vailiamin raltlan te chhawmdawlna atana buhfai semchhuah tur dawn a ni leh Sub-Hqrs. YMA leh an huamchhunga Branch YMA te nen thawhhona tha tak neia semchhuah a ni tur chu lawmawm a tih thu sawiin, a hmasa ber atan Tuichangral South Group YMA huamchhunga Branch YMA hrang hranga semchhuah tur buhfai phurtu Motor pahnih chu a vailiam a. He hunah hian SDO (Sadar) Rebecca Laldinmawii Hrahsel leh DC Office-a thawk te bakah Sub-Hqrs. YMA Serchhip-a hruaitute telin Branch YMA te hian buhfai hi raltlan te hnenah an sem nghal a ni.
Serchhip District-a raltlan awm mek te chhawmdawlna atan semchhuah tur buhfai hi kg. 33,700 dawn a ni a, Serchhip District-a raltlan awm mek mi 908 te hnenah kg. 35 theuha sem tur niin tun dinhmuna buhfai semchhuah tura ruahman hi kg. 31,780 a ni dawn a, Sub-Hqrs. YMA Serchhip huamchhunga Branch hrang hrang ten an huamchhunga a semchhuah turin Sub-Hqrs. YMA kutah hian dah a lo ni tawh a ni.
Serchhip District Bawrhsap Paul L. Khuma chuan Serchhip District chhunga raltlan te hnena buhfai sem tur chungchang ah hian tun thla ni 3 khan lehkha tichhuakin Serchhip District-a raltlan te tana sem tur Buhfai rawn thleng hi Sub-Hqrs. YMA hnuaia Branch hrang hrang ten a semchhuah turin Sub-Hqrs. YMA kut-ah a awm tur thu a lo tarlang tawh a, Serchhip DC Office-a raltlan list awmsa chu Serchhip Sub-Hqrs. YMA huamchhunga Branch hrang hrangte hnenah pekchhuah niin raltlan awm mek te nen enfiahna neih leh a ni a, hemi hnua YMA Branch hrang hrang ten Serchhip DC Office-a report an thehluh atanga a lan danin tun dinhmunah Serchhip District-ah raltlan mi 908 an awm anga chhinchhiah niin heng mite hnenah hian buhfai hi mi pakhat tan kg. 35 zela semchhuah a ni anga. Serchhip District-ah hian tun dinhmunah YMA Branch 31-ah raltlan hi an awm mek a, heng zinga mi 648 te chu Myanmar atanga raltlan niin Bangladesh atanga raltlan mi 239 leh Manipur atanga raltlan mi 21 an awm a. Sub-Hqrs. YMA Serchhip in a huam loh Baktawng leh Chhuanthar Tlangnuam huamchhunga raltlan te hnena buhfai sem tur chu Baktawng Branch YMA leh Chhuanthar Tlangnuam Branch YMA te kutah awmin raltlan te hnena buhfai semchhuah hi July 24, 2026-ah chuan tihfel vek tura ruahman a ni.
Serchhip District-ah hian Myanmar atanga raltlan hi Sailulak-ah 4, Lungkawlh-ah 18, Leng-ah 22, N. Vanlaiphai-ah 39, Khawlailung-ah 7, Keitum-ah 11, Thenzawl-ah 107, Zote South-ah 4, Chhiahtlang-ah 8, Vanchengte-ah 5, Khawbel-ah 2, Mualpui Chhingchhip-ah 19, Baktawng-ah 62 leh Chhuanthar Tlangnuam-ah 58 bakah Serchhip-a Branch hrang hrang 11-ah mi 282 an awm a. Serchhip-a awm te hi Kawnpui South-ah 67, Chhim Veng-ah 46, Darnam Veng-ah 41, Chanmari Veng-ah 26, Hmar Veng-ah 24, Dinthar Veng-ah 19, Field Veng-ah 18, P&E Veng-ah 16, Kawnpui North-ah 15, New Serchhip Bazar-ah 7 leh IOC Veng-ah 3 te an ni.
Bangladesh atanga raltlan mi 239 te hi Thenzawl-a awm te vek niin an zinga mi 134 chu Thenzawl Farm Veng-ah awmin Thenzawl Field Veng-ah mi 67, Thenzawl Kanan-ah 24 leh Then-zawl Venghlun-ah 14 an ni.
Manipur atanga raltlan rawn lut mi 21 la awm mek te zinga 10 te hi Serchhip P&E Veng-a awm an ni a, N. Vanlaiphai Bangla Veng-ah 7 leh Thenzawl Venghlun-ah mi 4 an la awm bawk.