Mizoram Police ten kumin ah ruihhlo man tam
Mizoram Police ten thuchhuah siama an tarlan danin kumin-a kum chanve, January atanga June thla tawp thleng khan ruihhlo chi hrang hrang tam tham tak an man a, Heroin kg. 34 zet manin Methamphetime pawh kg. 315 chuang an man a, Crystal Meth pawh kg. 20 chuang manin Ganja pawh kg. 60 chuang an man a, heng bakah hian Opium, Morphine, Codeine leh Aplrazolam te pawh manin ruihhlo an man zawng zawng hi cheng vbc. 414 chuang hu zet a ni a. Heng ruihhlo kaihhnawih ah hian thubuai 219 ziahluh niin mihring 312 man an ni a, an zinga 57 te chu ramdang mi an ni bawk.
Mizoram Police te chuan thla ruk chhunga heti zat ruihhlo man a ni hian ruihhlo beihna kawnga Mizoram Police hmalakna leh thawhrimna chiang taka a tarlan rualin nasa lehzuala ruihhlo dona kawnga hmalak a tul zia a tarlang chiang hle nia tarlangin, “Kan ram leh hnam humhimna atana Sawrkar, VC, YMA leh NGO hrang hrang tanghovin ruihhlo do beihpui kan thlaknaah theihtawp min chhuahpui a, ruihhlo tawlh report kawngah te tan min lakpui turin Zoram mipuite kan insawm thar leh a ni,” an ti bawk.
Hetihlai hian Excise & Narcotics Department chuan nimin khan Review Meeting neiin he huna tarlan a nih danin kumin january atanga June thla tawp thleng khan Rakzu litre 37,100.414 man tawhin Zu bilhlai litre 75,646; Sapzu litre 14,591.880; Beer litre 21,290.800 leh rampawn atanga lakluh Zu litre 40 bakah BEDC litre 499.100 an man bawk.