Serchhip District-ah Draft Electoral Roll tarchhuah niin Vote nei thei 54,180 an awm mek
Serchhip DC Meeting Hall-a Draft Electoral Roll tarchhuahna hunah hian District Election Officer Paul L. Khuma chuan Draft Electoral Roll tarchhuah tura awm theih nana thawktute inpekna leh thawhrimna fakawm a tih thu sawiin, May ni 20 atanga rim taka thawkin Draft Roll tarchhuah theiha peihfel a lo ni ta chu lawmawm a tih thu a sawi a. Final Roll atana inbuatsaihnaah a hmaa thawhhona tha tak awmsa vawngnung reng turin Political Party aiawhte leh khawtlang hruaitute a sawm a. Harsatna an nei anih chuan District Election Office chu tanpui turin an inhawn reng thu sawiin, Draft Roll thar chu a tlangzarh hnuah ERO te leh Political Party hrang hrang aiawhte hnenah a sem chhuak nghal a ni.
He hunah hian Election Officer (EO) Lalchhanhimi chuan Serchhip District-a dinhmun tlangpui tarlangin, SIR 2026 kalpui a nih hma khan Serchhip District-ah hian Asembly Bial pathum- 26- Serchhip (ST) AC, 27- Tuikum (ST) AC leh 28-Hrangturzo (ST) AC te awmin Vote nei mi 55,389 an awm thu a sawi a, heng zingah hian Roll thar atana hming ziahluh theih tawh loh leh inziaklut duh lo (uncollectable) mi 1209 (2.18%) an awm a, chungte chu - mitthi tawh mi 647 (1.17%), Constituency danga insawn/pem tawh mi 201 (0.36%), Chinchang chhuizui theih tawh loh mi 144 (0.26%), Roll-a lo awm tawh 186 (0.34%) leh Sakhuana leh thildang engemaw avanga inziahluh duh lo mi 31 (0.06%) an awm thu a sawi a ni.
Draft Roll thar dinhmun sawiin 26- Serchhip (ST) AC-ah Vote nei mipa 9625 leh hmeichhia 11,050, an vaiin 20675 an awm a, 27- Tuikum (ST) AC-ah Vote nei mipa 8368 leh hmeichhia 8619, an vaiin 16,987 awmin 28-Hrangturzo (ST) AC-ah Vote nei mipa 8097 leh hmeichhia 8421, an vaiin 16518 an awm a, Serchhip District-a Draft Electoral Roll-a hming chuang zawng zawng chu 54,180 an nih thu a sawi a. Draft Roll tarchhuah a nih atang hian Inthunluh emaw, hming paih emaw, siam that duh emaw, address insawn duh emaw te tan August 4, 2026 thlengin ‘Claims & Objections’ hun hawn a nih dawn avangin ala danglam leh dawn thu a sawi bawk.
Hetianga Draft Roll tarchhuah a nih hnu hian Voter tinte chu Draft Electoral Roll-a an hming a chuan leh chuan lohte lo inen a, lo ngaihven theuh tura ngen an ni a, Draft Roll-a hming chuang lo palh emaw, qualifying date (1st July 2026)-a kum 18 tling tharte emaw chuan bialtu BLO-te hnenah dilna (Form 6) la chhuakin document thiltel ngaite nen theh luh leh tur a ni a, ECINET Mobile App emaw, voters.eci.gov.in emaw kaltlangin online-in mahniin a thehluh theih bawk. Electoral Roll-a hming chuang lo tur chite hming lo chuang an awm a nih chuan, Form 7 hmangin paih tura dilna a thlen theih bawk a. Heng bakah hian hming leh address thlak duhte tan dilna (Form 8) la chhuakin siam that a dil theih bawk a ni.