Serchhip DC hovin DDMA thutkhawm neih a ni
He thutkhawm Serchhip DC Meeting Hall a neih hi an Chairman leh Bawrhsap, Paul L. Khuma chuan kaihruaiin Department hrang hrangte inkarah thawhhona tha tak a awm chu lawmawm a tih thu a sawi a, Department hotute leh Zonal Officer-te chu an Bial theuh te uluk lehzuala vil zui (monitor) turin a chah a; mipuite beiseina leh thlamuanna thlen theitu an nih hre renga, thahnemngai taka thawk zel turin a sawm bawk a ni.
He thutkhawm ah hian Serchhip DC Office-a SDC leh DM&R-a Nodal Officer, Vanthangpuia hnen atangin Disaster Management Act 2005 hnuaia District Disaster Management Authoriry te thuneihna leh mawhphurhna hrang hrangte ngaihthlak niin, khuarel chhiatna (Disaster) laka mipuite him theih nana Dan-in thuneihna leh mawhphurhna a pek, Dan zawm tha duh lo te chunga hremna awm thei chi hrang hrangte pawh tarlan a ni bawk.
Hei bakah hian Serchhip District chhunga Zonal Officer hrang hrangte leh Police, PWD, PHE, P&E, Health, RD&AD hotute hnen atangin an hmalakna report ngaihthlak a ni bawk a, tun dinhmunah Serchhip District-ah hian khuarel chhiatna thleng avanga nunna chan phah hialna khawpa chhiatna lian tham (major incident) thleng a awm lo a. Serchhip District-ah chhiatrupna a lo thlen palha ranga taka chhawm-dawlna hna thawk turin Police Department hnuaiah Search & Rescue Team din fel a nih thu leh Medical lam buaipuitu tur Rapid Response Team pawh din fel a ni tawh thu tarlan a ni bawk.