Serchhip-ah leikhi vangin chhungkaw pathum an chhuak
Serchhip P&E VC hotute hnen atanga LENKAWL in thu a dawn danin tunhnai ruahsur ah khan Serchhip P&E Veng Lane-II tawp lam, Soil Department ram thlenhma velah leikhi awmin kawngpui bakah chenna In hnuai vel te leikhi hian a huam a, hemi huamchhung ah hian chenna In 8 bakah Mizoram UPC Biak In te awmin nimin tlai thim dawn thleng khan lei hi a che nia hriat a ni a, hei vang hian chhungkaw pathum te chuan nimin tlai thim dawn khan an bungrua te hmun him lamah thiarchhuakin chhungkaw dang te pawh hi fimkhur thu-ah hmun him lamah an riakchhuak bawk a ni.
Serchhip P&E Veng VC chuan helai-a leikhi hi nimin khan Zonal Officer leh SDO (Sadar) Rebecca Laldinmawii Hrahsel chuan a tlawh tih sawiin, leikhi kar-ah hian tuihawk te a luh lohna turin an hnawh bawk tih an sawi a. Leikhi avang hian Pu Hmingfaka In leh Pu C. Vanlalsiamthara te In inkar chu lirthei tlan phal loh turin khar nghal a ni bawk.
Tunhnaia chawlkhar khat chhung vel ruahsur avang hian Serchhip District-ah vanneihthlak takin chhiatna liantham lutuk thleng a awm rih lo nia hriat a ni a, PHE Department hotute chuan ruahsur avang hian Tui pump leh sem chungchang ah harsatna an tawk lo tih sawiin, tunah hian Serchhip-ah Private Water connection nei mi 4700 vel zet an awm tawh thu an sawi bawk.