Sawrkar laipui hotute kawm

Labour, Employment, Skill Development & Entrepreneurship Department changtu Minister Lalnghinglova Hmar chuan nizan hmasa khan Union Minister for Micro, Small & Medium Enterprises (MSME) Jatin Ram Manjhi chu New Delhi-a a chenna In-ah kawmin MSME kaltlanga Mizo thalaite hmasawnna tur hrang hrang an sawidun.

He inkawmna ah hian LESDE Minister Lalnghing-lova Hmar chuan Mizoram-a enterprise tam zawk te chu MSME hnuai an nih thu sawiin, Mizo thalai engemaw zatin eizawnna’n an hmang tih a hrilh a. “Mizoram chu mihring awm zat atanga chhuta thalai hnathawk rual tamna, MSME lama nasa zawka tan lakna tlak a ni a. Mizoram sawrkar Flagship policy ‘Bana Kaih (Handholding)’ hnuaiah pawh MSME kaihhnawih hmalakna tam tak a tel a ni.” a ti bawk.

He inkawmna ah hian Skill Development lama hmunpui tur, Mizoram-a MSME Technology Centre din chungchang sawidunin, State sawrkar atanga thehluh tulte tihfel hunah hma a lo lakpui tur thu MSME Minister chuan LESDE Minister hi a hrilh a. Thalaite tana Mizoram sawrkar hmalakna te chu lawmawm a tih thu sawiin, Ministry of MSME atanga puih theihna a awm chuan a inhawng reng tih a sawi bawk a ni.

Tourism Minister ni bawk Lalnghinglova Hmar leh Ministry of Tourism-a Addl. Secretary Suman Billa te chu niminpiah khan Mizorama Tourism project kalpui mek leh project thar thehluh tur chungchang sawiin an inkawm a. State pawn atanga tourist lo kalte chu Mizorama rei zawk cham tur leh hmun tam zawk an tlawhna tura hmalak dan tur an sawidun a. Nimin khan Ministry of Minority Affairs-a Joint Secretary, Shyama Prashad Roy leh Official dangte pawh kawmin MoMA hnuaia Mizoram-a Sports project hrang hrang dinhmun an thlirho a. India Tourism Development Corporation-a Chairman, Mugdha Sinna-i leh Ministry of Sports and Youth Affairs-a Joint Secretary Vineel Krishna te pawh a kawm bawk.