GST registration dilna ah document dik lo hmang

Mizoram Sawrkar Taxation Department chuan tunhnaia Goods and Services Tax (GST) Registration dilna thenkhatte chu thu dik tawk lo leh document lem hmanga dil an ni tih hmuhchhuah an nih thu an tarlang.

Hemi chungchanga thuchhuah an siamah Taxation Department chuan ngun taka a enfiah hnuah hetianga diklo taka registration diltu thenkhatte chu an sumdawnna hmun anga an sawi ah hmuh tur an awm loh thu leh an dilna a document an thehluhte pawh finfiah theih a ni lo tih hmuhchhuah a ni tih an tarlan bakah dilna thenkhatah phei chuan In/dawr luah tur neitute hriat miah lohvin an hming hmangin dilna an lo thehlut thin tih hmuh a ni bawk tih an tarlang a. Heng thil thlengte hi Department Officer-ten Risk-Based Scrutiny, Data Analysis leh Physical Verification an kalpui mek atanga hmuhchhuah a ni tih an tarlang a. Mizoram Goods and Services Tax Act, 2017 dan in a sawi angin hmalak dan tur ngaihtuah mek a ni tih an tarlang.

Taxation Department chuan mipuite, In neitute leh sumdawnna kalpuitute chu an Identity document, an address, an Mobile number, an e-mail address leh an personal information dangte GST registration atan emaw, sumdawnna dang atan emaw hmang tura dil an nih pawhin lo hmantir phal lo turin an ngen a. In neitute pawh GST registration atana hman tur Consent Letter, Rent Agreement leh document dang mamawh diltute chu enfiah hmasa turin a ngen bawk a. Mi tu pawhin identity document hmansualna, address hman sualna emaw, GST registration chungchang a thil rinhlelhawm emaw a hria a nih chuan Taxation Department hnenah hriattir theih reng a nih thu an tarlang bawk.