Rod size tlinglo hralh chungchang sawihona neih a ni

Supply Minister B. Lalchhanzova chuan Rod size tlinglo hman chuan Insak chakna chu nasa takin a tihniam thin tih sawiin, a him lo takzet tih a sawi.

Nimin khan FCS&CA Minister B. Lalchhanzova hovin a Pisa ah Mizoram-a Rod size tlinglo zawrh thin tihtawp dan tur sawiho a ni a, he hunah hian Supply Minister chuan Mizoram hmun tam takah Iron Rod te chu Dan-in a bituk aia tê hralh a awm nia thudawn bawhzuia sawihona chu koh a nih thu sawiin, lirnghing nasatna laia awm kan nih avangin In sak nana Rod kan hman te chu a len zawng, a rih zawng leh a chak lamah te mi thiamten a nih tur ang an duan chu a tling pha ngei ngei tur a ni tih a sawi a. Rod size tlinglo hman hian Insak chakna chu nasa takin a tihniam thin tih sawiin, a him lo takzet tih a sawi a ni.

He thutkhawm ah hian FCS&CA, Legal Metrology, PWD Quality Control Division, Mizoram Civil Engineers’ Association, Mizoram Consumers’ Union bakah All Mizoram Cements & Iron Rod Dealers’ Association te an tel a. Department leh pawl hrang hrang aiawh tel te hian Rod size tlinglo Mizoram-a a lo luh tan dan te leh a dolet dan tur kawng hrang hrang te an sawiho a. MCEA leh PWD lam ten Rod size tlinglo hman a hlauhawm dan te tarlangin, Minister chuan heng te hi mipuiah a tam thei ang ber puanzara, mipui te pawhin an Rod leiah fimkhur se a duh thu a sawi a ni.

He huna tel te hian hmalak dan tur kawng hrang hrang awm thei te sawiho in mipui him nan chak zawka hmalak an rel a. Iron Rod zuartu company te hnenah Rod Size dik chauh Mizorama rawn lalut tura hriattirna leh vaukhanna ziaka pek nise an ti a. BIS te nena thawhhona tihchak nise, Mizoram-a Rod Size diklo zuarte leh chutiang ti tura hma la tute zawngchhuak tura chak taka hmalak nise an ti bawk a. Hriattirna tihchhuah a nih hnu pawha ti lui te chu Rod zuar an ni emaw, Company an ni emaw, an chungah hremna lek ngei nise an ti bawk a. Mipuite pawhin Rod man tlawm ringawt um lovin Rod Size dik lei nachang hria se tiin hmalakna tur ruahmanna an siam a ni.