Synod Bookroom in Reduction Sale kalpui leh tan

Kum danga an lo tih tawh thin angin Synod Bookroom chuan nimin July 13, 2026 atang khan an thil zawrh te man tlawm zawka hralhchhuahna hun, Reduction Sale chu Mizoram pumah an kalpui leh tan a, Synod Bookroom Serchhip Branch-ah pawh Reduction Sale hi kalpui a ni.
Tunkar Inrinni thleng awh tur Reduction Sale hi Synod Bookroom Serchhip Branch-ah chuan nimin chawhma lam khan kalpui tan niin Upa C. Lalbiakthanga chuan hunserh hmangin bul a tan a, hemi hnu hian mipui a duh apiangte tan an thil zawrh te chu man tlawm zawka hralhchhuah niin tun tumah hian an thil zawrh hrang hrangte chu za zela 5 atanga za zela 80 thlengin hralhchhuah a ni a, mipui ten an hlut hle a ni.

Tun dinhmunah Synod Bookroom hnuaiah hian Branch 16 leh Distribution Centre 2 a awm mek a, Reduction Sale hi mipuiin lehkhabu tha leina hun remchangah hmangin an hlut thin hle a. Sawrkar Office leh Kohhran leh Mimal Library neite pawhin a hlawma lehkhabu leina hunah an lo hmang tawh thin a ni. Aizawl-a Synod Bookroom Headquarters Mission Veng-ah chuan Synod Moderator Rev. John Raldosanga chuan Reduction Sale hi Pathian hnenah hlanin Kohhran mipuite’n tangkai taka an hman theih nan a hawng a ni.