YMA in SIR 2026 Draft Roll-a mihring pun nasatna hmunte en tha leh turin thuneitute an ngen dawn
Mizoram leh India ram State thenkhata Electoral Roll Special Intensive Revision (SIR), 2026 kalpui mek chungchangah nimin khan Central YMA hruaitute chuan Aizawl-a Central YMA Committee Room-ah thuthar thehdarhtute kawmin Central YMA President R. Lalngheta chuan SIR, 2026-ah hian kum 2005 Electoral Roll-a anmahni emaw, an thlahtute emaw awm te tan chuan harsatna a awm lo tih sawiin, dik leh felfai taka inthlunzawm theih a ni a, chutihlain 2005 Electoral Roll-a anmahni emaw, an thlahtute emaw awm lo tan erawh chuan SIR 2026 Draft Roll-ah an awm a nih pawhin endik nawn lehna (hearing) neih huna an lut a nih loh chuan luh mai theih erawh a ni lo tih a sawi a. SIR 2026 Draft Roll atanga a lan danin khawthlang lam ramri hnaih Constituency-ah mihring an pung nasa lutuk chu an ngaih a that loh thu sawiin, en tha leh tura thuneitute ngen an tum thu leh ECI-ah pawh lamkal intirin a hmunah an zuk kalchilh dawn thu a sawi a; voter pun tam zualna hmuna SIR buaipuitu zingah thawk tha tawk lo an awm nia an hriat thu a sawi bawk.
Central YMA hruaitute chuan tuna SIR, 2026 hi khua leh tui dik tak te chauh Electoral Roll-a an awm theihna tura thil pawimawh tak a nih rualin tih dik loh palh anih erawh chuan khua leh tui dik tak ni lo te tan awlsam taka Electoral Roll-a luh theihna a nih avangin fimkhur taka kalpui a tul thu an sawi a. July ni 4-a Draft Electoral Roll tihchhuah kha ngun taka zirchiangin Constituency thenkhatah SIR neih hnuhnung ber, kum 2005-a Roll-a awmzat leh mihring pundan nena chhutin Enumeration Form thunluh (Digitisation) ah hian thil felhlel leh mihring pun dan a chhutin thil diklo a awm ni a an hriat bakah Mapping chungchang ah thil dikhlel a awm ni a an hriat thu an sawi a. Tuna Hearing neih tura ruahman mek ah pawh YMA Branch te leh NGO te chu thahnem ngai taka tel turin an ngen bawk a ni.